Një vit më parë, pak javë pasi siguroi mandatin e katërt qeverisës, kryeministri Edi Rama nisi aksionin kombëtar për mbrojtjen e territorit.
Pika e parë dhe më e debatueshme e ndërhyrjes ishte Thethi, ku fadromat shembën dhjetëra bujtina, hotele dhe ndërtime pa leje, duke shkaktuar përplasje me banorët dhe reagime të forta publike, në kulmin e sezonit turistik.
Pamjet e shembjeve në zemër të një prej destinacioneve më të vizituara turistike të vendit dominuan për javë me radhë debatin publik, ndërsa banorët akuzonin qeverinë se po godiste ekonominë e zonës në mes të verës.
Nga ana tjetër, qeveria argumentonte se ndërhyrja ishte e domosdoshme për të ndalur ndërtimet pa leje dhe për të mbrojtur territorin.
Një vit më vonë, Rama u rikthye në Theth, këtë herë jo për një aksion me fadroma, por për të zhvilluar një bashkëbisedim me aplikues të Paketës së Maleve, ligj që qeveria e konsideron një instrument për zhvillimin ekonomik të zonave malore.
Vizita vjen në një kohë kur prej më shumë se 50 ditësh protestuesit kundërshtojnë Paketën e Maleve, duke kërkuar shfuqizimin e saj. Ata pretendojnë se nisma hap rrugën për tjetërsimin dhe shitjen e pronave në zonat malore, ndërsa qeveria i ka hedhur poshtë këto akuza.
Sot gjatë takimit në Theth, kryeministri përsëriti se nuk do të ketë tërheqje nga kjo nismë.
“Paketa e Maleve nuk është për uzurpatorë, as për biznesmenë që nuk kanë marrëveshje me ju, as për oligarkë. Është për të vënë në lëvizje ekonominë e trashëgimtarëve të pronave në territore ku toka nuk është ndarë sipas ligjit 7501 dhe për të krijuar mundësi zhvillimi aty ku turizmi është e vetmja alternativë“, tha Rama.
Kryeministri u ndal edhe te aksioni i verës së kaluar, duke argumentuar se vala e ndërtimeve pa leje nisi pasi, sipas tij, një pjesë e banorëve keqkuptuan premtimin për legalizimin e objekteve ekzistuese.
“Unë nuk kam ardhur këtu dhe kam thënë: vazhdoni dhe ndërtoni se i legalizojmë. Kam thënë se do të legalizojmë ndërtimet ekzistuese. Pas vizitës sime shpërtheu ndërtimtaria pa leje, me idenë se do të përfitonin edhe ata. U zaptua kartolina botërore e Thethit dhe kjo nuk mund të lejohej“, u shpreh Rama.
