Analisti Andi Bushati, në një lidhje direkte për Syri Tv, ka komentuar aferën “Bankers Petroleum”, për të cilën tre ditë më parë Prokuroria e Fierit lëshoi 14 urdhër-arreste për evazion fiskal dhe pastrim parash.
Bushati e krahasoi këtë aferë me skandalin e inceneratorëve dhe duke theksuar se nuk kemi të bëjmë me evazion fiskal, por me një formë të bashkëpunimit të qëllimshëm mes kompanisë dhe zyrtarëve shtetërorë që duhet ta kontrollonin.
Ai theksoi se, ashtu si në rastin e inceneratorëve, mungesa e kontrollit shtetëror ka qenë e qëllimshme. Sipas tij, nuk bëhet fjalë për neglizhencë, por për një akt të vetëdijshëm korruptiv të shtetit.
Bushati paralajmëroi se sa më shumë të hetohet kjo çështje, aq më shumë të vërteta të errëta do të dalin në dritë. Ai kujtoi edhe një episod të disa viteve më parë, ku ish-prokurori Adriatik Llalla kishte akuzuar ambasadorin amerikan Donald Lu se po pengonte hetimet për “Bankers”.
Bushati: Nuk mund të japësh një pasuri dhe të presësh 2 dekada me radhë pa marrë asgjë në këmbim, kjo tregon, minimumi, se nuk është çështje evazioni fiskal por është çështje bashkëpunimi i Bankers me zyrtarët shtetërorë që duhet ta kontrollonin, është pak a shumë e ngjashme si historia e inceneratorit.
Që incenerator nuk kishte dhe asnjë zyrtar që kishte për detyrë të kontrollonte si po bëhet, si kanë shkuar punimet, ku kanë shkuar paratë e derdhura, bënte sikur nuk e shihte çfarë po ndodhte;
Dhe në këtë kuptim, kjo nuk është thjesht një histori evazioni fiskal, është një histori korrupsioni nga shteti i cili e ka lejuar në mënyrë të ndërgjegjshme këtë vjedhje.
Sa më shumë të gërmojmë, aq më shumë gjëra të errëta do dalin nga kjo histori. Po ta kujtoni, disa vite përpara ka pasur një debat, ku ish-prokurori Adriatik Llalla akuzonte ambasadorin Donald Lu se pengonte të hetonte për Bankers. Ambasadori amerikan Donald Lu është një nga ata që ne e quajmë baballarët e reformës tonë në drejtësi.
Pra ata që ne i konsiderojmë si baballarët e reformës në drejtësi, kanë qenë shkak që këtu të vazhdojë vjedhja.
Prandaj them që historia e Bankers është një histori që ndërthur të gjitha fijet e errëta jo vetëm të shtetit shqiptar por mënyra si janë korruptuar diplomatët, mënyra si funksionon në një shoqëri të kapur relacioni private me publiken, ku asnjëherë publikja ose ato që duhet të mbrojnë interesin publik, nuk bëjnë detyrën e tyre por e shfrytëzojnë postin publik për t’u pasuruar për vete.
