Reuters ka raportuar se Hamasi ka pranuar propozimin për armëpushim armëpushim 60-ditor në Gaza dhe marrëveshjen për lirimin e pengjeve, të formuluar nga SHBA, megjithëse ka kërkuar disa ndryshime të vogla në formulime.
Draft-marrëveshja u miratua këtë javë nga Ministri Izraelit i Çështjeve Strategjike Ron Dermer gjatë vizitës së tij në Uashington.
“Ne u kemi dorëzuar ndërmjetësve, Katarit dhe Egjiptit, përgjigjen tonë ndaj propozimit për armëpushim.
Përgjigja e Hamasit është pozitive dhe mendoj se duhet të ndihmojë dhe lehtësojë arritjen e një marrëveshjeje”, tha një zyrtar i Hamasit për Reuters në kushte anonimiteti.
Sipas draft-marrëveshjes së armëpushimit, tetë pengje të gjalla do të liroheshin ditën e parë të armëpushimit, me dy të tjerë që do të pasonin në ditën e 50-të.
Plani gjithashtu përshkruan një kthim me faza të trupave të pengjeve izraelite, pesë në ditën e shtatë të armëpushimit, pesë të tjerë në ditën e 30-të dhe tetë të fundit në ditën e 60-të.
Sipas draft-marrëveshjes, gjithsej dhjetë pengje të gjalla do të lirohen dhe trupat e 18 të tjerëve do të kthehen.
Marrëveshja, e ndërmjetësuar nga Katari, bazohet në të ashtuquajturin kuadër Witkoff të propozuar nga i dërguari amerikan Steve Witkoff.
Reuters shkruan se grupi i Hamasit dëshiron garanci se negociatat për t’i dhënë fund luftës do të zhvillohen gjatë armëpushimit 60-ditor dhe se armëpushimi do të zgjatet nëse është e nevojshme, derisa të dyja palët të arrijnë marrëveshje.
Po ashtu, Hamasi dëshiron që Kombet e Bashkuara të përfshihen përsëri në ofrimin e ndihmës, që të sigurojë përmbushjen e nevojave humanitare, duke përfshirë funksionimin e furrave të bukës, dhe që Izraeli të mos e kufizojë atë ose ta përdorë si levë ndikimi gjatë bisedimeve.
