Ka përfunduar rinumërimi i votave për Qarkun e Tiranës, ku pavarësisht se dy forcave kryesore politike PS dhe PD u janë hequr me qindra vota, sërish nuk ka patur lëvizje në numërt mandate dhe as në emra deputetësh të zgjedhur.
Më konkretisht, Partisë Demokratike i janë hequr 612 vota, ndërsa Partisë Socialiste 381 vota. Po ashtu, vota u janë hequr edhe partive të vogla, më konkretisht Lëvizjes Bashkë 57 vota, Partisë Mundësia dhe Nisma Shqipëria Bëhet nga 44 vota, ndërsa PSD 34.
Edhe sa i përket kandidatëve, është ngushtuar diferenca mes Olta Xhaçkës dhe Blerina Gjylametit, por jo aq sa ta bënte të mundur heqjen e mandatit të së parës.
Anëtari i KAS, Ledio Braho, deklaroi se procesi ka qenë transparent dhe se rezultati i rinumërimit nuk solli lëvizje të konsiderueshme që të cenonin integritetin e zgjedhjeve.
“Unë mendoj se për aq kohë sa jemi në demokraci, transparenca i shërben demokracisë. Nuk ka pasur lëvizje të konsiderueshme të votave që të bëjnë pis procesin”, u shpreh Braho.
Sipas tij, ndryshimi i qëndrimeve nga disa kandidatë pas hapjes së kutive tregon se procesi i rinumërimit ka shërbyer për të sqaruar çdo dyshim.
“Nuk kemi më akuza për trafikim votash brenda subjekteve, por as mes subjekteve. Të gjitha ato lëvizje që reflektohen dhe konsiderohen si vjedhje apo manipulim, për mendimin tim janë gabim njerëzor”, theksoi Braho.
