Ditët e fundit, në plazhin e Shëngjinit është mbajtur festivali i “UNUM”, i cili njihet për “shthurjen” e të rinjëve”, ku vijnë kryesisht të huaj, si dhe përdorimin masiv të lëndëve narkotike.
Gjithsesi, pavarësisht “ilegalitetit” për të cilin njihet ky festival, duket se disa prej të rinjëve nuk i shpëtojnë kontrollit të Policisë. Blutë e Lezhës, bëjnë me dije se kanë vënë nën hetim dy shqiptarë dhe 4 turistë të huaj, pasi janë kapur me doza kokainë, kanabisi dhe ekstazi me vete.
“Specialistët e Seksionit për Hetimin e Narkotikëve referuan materialet në Prokurori ku nisi procedimi në gjendje të lirë për veprën penale “prodhimi dhe shitja e narkotikëve”, për A. J., 25 vjeç, F. Y., 30 vjeç dhe për 4 turistët e huaj D. C., 33 vjeç, K. A., 37 vjeç, P. P., 34 vjeçe dhe A. H., 33 vjeç, pasi gjatë kontrollit fizik ndaj tyre dhe në automjetet me të cilat ata qarkullonin, në Shëngjin, shërbimet e Policisë gjetën dhe sekuestruan në cilësinë e provës materiale sasi të vogla të lëndëve të dyshuara narkotike kokainë, kanabis dhe ekstazi”, njofton policia vendore.
Materialet proceduriale i kanë kaluar Prokurorisë së Lezhës për veprime të mëtejshme.
