Partia e Lirisë e drejtuar nga Ilir Meta do të garojë më vete në zgjedhjet e ardhshme lokale, të cilat pritet të mbahen në vitin 2027.
Këtë fakt e ka konfirmuar vetë Sekretari i Përgjithshëm i PL-së, Tedi Blushi gjatë një intervistë për News24, ku tha se kanë filluar me analizën e rezultatit të zgjedhjeve të 11 Majit dhe se kanë “ndezur motorët” për zgjedhjet lokale, ku do të garojnë me logon e tyre.
“Tani Partia e Lirisë ka filluar me shumë qetësi, por me nxitim, analizën e këtij rezultati. Ne dje kemi patur një mbledhje të gjatë të Kryesisë së Partisë së Lirisë për të analizuar të gjithë faktorët dhe shkaqet që prodhuan dhe sollën këtë rezultat dhe sigurisht që paralelisht kemi ndezur motorët në funksion të zgjedhjeve të afërta lokale, ku Partia e Lirisë do të garojë me logon e saj.” – tha Tedi Blushi.
Kujtojmë se Partia e Lirisë dhe PD e Sali Berishës kanë garuar në koalicion së bashku, si në zgjedhjet lokale të vitit 2023, po ashtu edhe në zgjedhjet parlamentare të vitit 2025.
Kjo ka sjellë akuza se anëtarët e Partisë së Lirisë kanë marrë vende në Këshillat Bashkiakë, si dhe në Kuvend, pa patur vota. Kujtojmë se në zgjedhjet e 11 Majit, Partia e Lirisë kishte 4 mandate në listat e sigurta të PD-së, ndërkohë që Ilir Meta si kandidat në listën e hapur të Tiranës arriti të merrte vetëm 7 984 vota në total, duke përfshirë dhe ato të diasporës.
I pyetur pak ditë më parë gjatë një konference për mediat nëse a ka një krisje të marrëdhënie me Ilir Metën dhe a po planifikon kreu i PL-së që të garojë më vete në zgjedhjet e ardhshme bashkiake, Berisha tha se çdo forcë politike ka të drejtën të bëjë zgjedhjen e vetë dhe se aleanca me të ishte vetëm për zgjedhjet parlamentare të 11 Majit.
