Politologu Ilir Kalemaj shprehet se prurja e deputetëve nga platforma “Deputeti që duam” dhe kuota gjinore janë vetëm fasada që mbulon fenomene të tjera, ku shumica e kandidatëve janë anonimë dhe militantë të PS.
Kalemaj vë në dukje se deputetët e rinj janë pa përvojë pune, me njohuri të cunguara mbi ligjin, dhe formim të dobët akademik.
Kalemaj thekson më tej se kemi dobësim të legjislativit, mbivendosje të ekzekutivit dhe sensi i vendimmarrjes vertikal.
“Po të shihet në pamje të parë, duket se një pjesë e mirë e atyre deputetëve të rinj vijnë nga ‘Deputeti që duam’, po të shohim përfaqësimin gjinor shohim që kemi përfaqësim adekuat, por kjo është vetëm fasada, po ta gërvishtim shohim fenomene të tjera. Shumica e kandidaturave të promovuara nga Rama, s’janë të reja, në kuptimin që vijnë nga bota akademike, shoqëria civile, media, por janë nga anonimati publik dhe militanca e PS.
Përjashtimet janë të rralla, një kandidat në Durrës Loer Kume, Neomalësorja, ndërsa pjesa tjetër është pjesë e strukturave të PS, pa përvojë pune dhe jetësore. Janë ridikulizuar gjatë fushatës siç pamë rastin e Zegjinesë së Fierit, që mund të ishte për një tallava, por për të qenë një deputete…Kemi bjerrje të cilësisë parlamentare, në disa Parlamente rresht.
Sot përqindja e biznesmenëve ka shkuar nga ¼ në ¾. Z.Rama me 83 mandate deputeti, plus 3 në gatishmëri, s’ka nevojë për kurrfarë debati parlamentar, dhe deputetët me përvojë legjislative janë shumë pak. Pjesa më e madhe kanë cungim akademik. Kemi dobësim të legjislativit, dhe mbivendosje të ekzekutivit, dhe sensi i vendimmarrjes vertikal.
Përbërja e kabinetit s’është as politike, as teknike, tashmë do jetë më tepër anonime. Janë persona në dukje të paatakueshëm, por nuk sjell as backround politik të fortë…Ti s’arrin dot të bësh një oponencë teknike”- tha Kalemaj në MCN TV.
