Pas një seance maratorën prej 11 orësh, Gjykata e Evelpidon në Athinë të Greqisë ka lënë në burg 46-vjeçarin Mikel Selimaj, si dhe dy të arrestuarit e tjerë si bashkëpunëtorë, për vrasjen e 41-vjeçarit Altin Arapaj, i cili u ekzekutua të enjten në një zonë me vreshta në Rafinë.
Mikel Selimaj përballet me akuzën e “ Vrasje me dashje”, ndërsa dy të tjerët me akuzën e “Bashkëpunim në vrasje”. Rasti evoluoi në një thriller pasi viktima, pasi u qëllua në faqe nga 46-vjeçari, Mikel Selimaj telefonoi partneren e tij duke iu lutur për ndihmë.
“Më ndihmoni, Keli më qëlloi… në kokë. Po vdes. Më gjej në celular sepse nuk e di ku jam.” ishin fjalët e tij të fundit.
46-vjeçari, emri i të cilit u bë i ditur nga viktima, tani pohon se nuk e di nëse Altin Arapaj vdiq përfundimisht nga plumbi që mori prej armës së tij, pasi siç tha ai, u gjet 130 metra larg vendit të ngjarjes.
Në kërkimfaljen e tij, të bërë publike nga mediat greke, ai deklaroi se kishin konsumuar kokainë dhe se vrasja e shokut të tij, nuk ka të bëjë fare me larje hesapesh apo trafik droge. Sipas tij, arma ishte e viktimës, duke pretenduar se Altin Arapaj u qëllua në momentin kur ai po përpiqej ta çarmatoste.
“Unë nuk i kam kryer veprimet për të cilat akuzohem. Në fakt, unë jam i varur nga droga dhe kur ndodhi incidenti, si unë ashtu edhe i ndjeri ishim nën ndikimin e drogës. Në fakt, dy ditë më parë, ne përdornim kokainë së bashku dhe ndërsa viktima këmbëngulte të mos kthehej në shtëpinë e tij, unë e nxita të kthehej te partnerja dhe fëmijët e tij. Rasti nuk ka të bëjë fare me një kontratë vdekjeje, larje hesapesh apo trafik droge, të cilat mund të çojnë në një akt të tillë. Për më tepër, arma e krimit nuk ishte e imja, por e viktimës, e cila për ndonjë arsye të pashpjegueshme bëri një lëvizje për ta përdorur dhe, ndërsa unë po përpiqesha të mbrohesha dhe ta çarmatosja, ajo shpërtheu dhe plumbi e goditi në faqe.”
Pas të shtënave, viktima foli me gruan e tij. 46-vjeçari Mikel Selimaj këmbënguli në mbrojtjen e tij se nuk kishte qëllim ta vriste, pasi nuk kishte asnjë goditje të mirëfilltë, siç thotë ai.
“Viktima mbijetoi, telefonoi gruan e tij dhe më pas vdiq. Ne kemi qenë miq me viktimën për njëzet vjet, kemi përdorur kokainë së bashku, dhe unë e kam ndihmuar edhe me punët e tij personale, konkretisht me problemet që i kishin krijuar dy shitës makinash, të cilat nuk po ia jepnin makinat, dhe unë ndërhyra që të mos i zhvatnin paratë.”
I pandehuri këmbëngul se viktima eci edhe 130 metra nga vendi i ngjarjes dhe tani po kërkon raportin mjeko-ligjor për të përcaktuar shkakun e saktë të vdekjes.
Si viktima, ashtu edhe autori janë persona me precedentë penalë në Greqi, si dhe të përfshirë në trafikun e drogës. Por, gruaja e viktimës, duke folur për televizionet greke, ka dhënë një version tjetër për motivet që lidhen me krimin. Sipas saj, shkaku ishte një shtëpi në pronësi të një amerikani dhe e marrë me qira prej vitesh nga një kanadez.
“Ky burrë e kishte paralajmëruar, i thoshte vazhdimisht ‘largohu sepse shtëpia është e imja, do ta marr unë, je në mes të asgjësë’.”
Takimi fatal duket se është organizuar për të zgjidhur një keqkuptim në lidhje me një shtëpi luksoze në zonën e Lucas, ndërsa pak ditë më parë pati një vendim gjyqësor përkatës.
“Të hënën, kur humbën gjyqin dhe iu desh të paguanin kompensim, sipas mendimit tim, kanadezi e telefonoi dhe i tha: ‘E dini çfarë? Meqë duhet të paguaj këtë kompensim, merr këto para dhe hiqi nga dora ime.’ Në fund, e shlyen shtëpinë bashkë me vdekjen e burrit tim” ka thënë gruaja e Altin Arapajt.
