Është identifikuar shqiptari që u arratis nga burgu i sigurisë së lartë Koridhalos në Greqi. Bëhet fjalë për 48-vjeçarin Edmond Taga, i dënuar për trafik droge.
Sipas informacioneve paraprake, Taga ka përfituar nga një moment pakujdesie gjatë hapjes së portës së burgut, në kohën kur po nxirreshin mbeturinat. Ai ka arritur të largohet me shpejtësi, duke i shpëtuar kontrollit të forcave të sigurisë.
Menjëherë pas arratisjes, autoritetet greke kanë nisur një operacion të gjerë kërkimi për kapjen e tij. Forca të shumta policore janë angazhuar në ndjekje, por deri më tani 48-vjeçari nuk është lokalizuar.
Dyshimet e para janë se ai ka mundur të largohet përmes rrugicave pranë burgut, ndërsa hetuesit po verifikojnë nëse arratisja ka qenë e organizuar paraprakisht apo një veprim spontan i të dënuarit.
Ndërkohë, autoritetet greke vijojnë hetimet për të zbardhur plotësisht rrethanat e ngjarjes dhe për të përcaktuar nëse ka pasur ndihmë nga persona të tjerë në realizimin e arratisjes.
