Drejtuesi i SPAK, Altin Dumani tha se data e zhvillimit të operacionit të përbashkët antidrogë mes Shqipërisë dhe Italisë për goditjen e një grupi kriminal të trafikut ndërkombëtar të lëndëve narkotike, nuk ka lidhje me atë të zgjedhjeve parlamentare të 11 majit.
“Nuk ka të bëjë fare me zgjedhjet. Ne veprojmë si skuadër edhe datën e dakordësojmë së bashku. Operacioni zhvillohet në Shqipëri dhe Itali dhe është në vazhdim. Ajo që është e sigurt është që është një datë e dakordësuar me autoritetet italiane dhe me Eurojust.”, tha Dumani gjatë konferencës për mediat.
Ndërsa prokurorët italianë deklaruan se nuk kanë të dhëna që anëtarët e grupit kriminal të përfshirë në këtë operacion të kenë pasur mbështetje politike.
Operacioni u krye me mbështetjen e Interpolit, Zyrës së Ekspertëve të Sigurisë në Tiranë, Policisë Shqiptare, nën koordinimin e Drejtorisë së Qarkut Antimafia të Barit dhe SPAK të Tiranës.
Sipas hetimeve, organizata kriminale shqiptare vepronte në shkallë të gjerë përgjatë rrugëve ballkanike, me degë drejt Evropës Veriore dhe vende të konsoliduara zbarkimi për drogën në Puglia, e konsideruar një qendër strategjike për shpërndarjen e narkotikëve.
