Nga Boldnews.al
Zgjedhjet varen nga vullneti politik i votuesve dhe nuk caktohen nga sistemi i drejtësisë. E, megjithëse kjo devizë është e njohur sa ka jetë politike në botë, Prokuroria e Posaçme (SPAK) në Shqipëri hyri në garën parlamentare të 11 majit si një “faktor i tretë”, krahas maxhorancës së Edi Ramës dhe opozitës së Sali Berishës, por që rezultoi me ndikim më pak se “partiçka” e Enkelejd Alibeaj.
Përgjatë muajit të fushatës dhe periudhës që e paraprinë atë, shqiptarët dëgjuan premtimet e kryeministrit Rama për “pasaportë europiane”, projektin ekonomik të Berishës për rimëkëmbjen e vendit dhe…premtimet e SPAK-ut për parandalimin dhe goditjen e krimit elektoral.
Ndërkohë që premtimet e dy të parëve do të duhet të provohen pas rezultatit të zgjedhjeve të së dielës, ato të lëshuara për parandalim nga SPAK-u arritën në finishin e tyre.
Në janar të këtij viti, drejtuesi i Prokurorisë së Posaçme, Altin Dumani, prezantoi platformën për parandalimin e krimeve zgjedhore. Në kuadër të këtij dokumenti strategjik, u nënshkrua një Marrëveshje Bashkëpunimi mes Prokurorisë së Përgjithshme, SPAK-ut dhe Komisionit Qendror të Zgjedhjeve.
SPAK mori një rol parësor në zbatimin e kësaj strategjie, ku Dumani, në cilësinë e drejtuesit të strukturës së posaçme hetimore, zhvilloi takime në prokurori lokale, ku shpërndante “porosi dhe direktiva”, sipas mesazheve publike të shpërndara në media nga stafi i tij.
Në Shkodër, Altin Dumani la “porosi të posaçme” për mënyrën e bashkëpunimit kundër krimeve zgjedhore. Të njëjtin mesazh përsëriti edhe në prokurorinë e Lezhës. Më herët, “direktivat” e kreut të SPAK-ut u dëgjuan nga prokurorët në Fier, në Durrës apo u përcollën me përfaqësues edhe në prokurorinë e Elbasanit. Madje, në këtë të fundit, “porositë speciale” u përcollën dy herë.
Ndërkohë, prokurori të tjera, si ajo e Tiranës apo e Vlorës, nuk patën fatin që të merrnin orientime specifike nga Prokuroria e Posaçme, duke i lënë këto të fundi në një lloj forme, si “jetime”.
E gjithë strategjia e ndjekur shërbeu për të ngritur kultin e individit të kreut të SPAK-ut, Altin Dumani, i cili mori një rol parësor në të gjithë këtë histori, megjithëse ligjërisht dhe procedurialisht, ai nuk ka asnjë kompetencë për të shpërndarë “porosi dhe direktiva” për drejtuesit lokalë të prokurorive.
Natyrisht, ky kult individi në fushatë zgjedhor u ngrit edhe falë vanitetit të shefave të prokurorive në qytete, të cilët kokëulur dëgjonin dhe mbanin shënime mbi “orientimet” që vinin nga SPAK-u.
Gjithësesi, raporti mes prokurorëve është një zgjedhje e tyre dhe Dumani ka arritur t’i vendosë nën kontroll, duke nxjerrë jashtë loje Prokurorin e Përgjithshëm, Olsian Çela.
Ajo që ka rëndësi për publikun, nuk është “fërkimi” mes prokurorëve, as kulti i individit, por rezultatet në parandalimin e krimeve zgjedhore.
Këtu, rezultatet janë shumë pranë zeros. Strukturat ligjzbatuese në Elbasan kanë përcjellë informacione të bollshme për dyshime mbi blerje votash në qendrat elektorale të Partisë Socialiste. Nga SPAK-u, deri më tani, nuk u urdhërua asnjë kontroll ambjentesh për të konfirmuar dyshimet, por përfaqësuesit e Prokurorisë së Posaçme janë mjaftuar me dy takime “orientuese”.
Në Shkodër, agjentët e Byrosë Kombëtare të Hetimit kryen kontrolle mbi disa përfaqësues të stafit të Tom Doshit, vetëm pasi ky i fundit dhe partia e tij ngritën pretendime politike kundër socialistëve të Edi Ramës.
Në Tiranë, Durrës, Fier, Vlorë, Gjirokastër, Korçë, Sarandë e qendra të tjera të rëndësishme, nuk ka pasur asgjë që të tërheqë vëmendjen e SPAK-ut.
Strategjia dhe angazhimi i Prokurorisë së Posaçme kishte synin parësor parandalimin e krimeve zgjedhore, blerjes së votës, tjetërsimit të vullnetit të qytetarëve. Tashmë që fushata elektorale përfundoi dhe qytetarët janë thirrur për të zgjedhur Parlamentin e ri, parandalimi i krimeve zgjedhore shfaqet vetëm si një utopi.
