Drejtuesit politik i PD për Qarkun Fier, Gazment Bardhi ka reaguar nëpërmjet një deklarate për mediat në lidhje me shoqërimin në komisariat të kandidatit demokrat Fation Semanjaku.
Bardhi paralajmëroi drejtuesit e Policisë së Fierit që të heqin dorë nga metodat kriminale të ngjashme me sigurimin e shtetit në diktarurë, pasi pas 11 majit, nuk do të ketë as Edi Rama as Belinda Balluku që t’ju dalë për zot.
Partia Demokratike e cilësoi ngjarjen si një veprim me prapavijë politike dhe një tjetër dëshmi të presionit që, sipas saj, po ushtrohet ndaj opozitës në fushatë.
Bardhi: “Kandidati Semanjaku është ndalur fillimisht nga banditë me uniformë të të korruptuar në krye të Bashkisë Fier, Armando Subashi, që të ushtrojë veprimtarinë e tij elektorale nëpërmjet stendave që janë forma më demokratike në të gjithë botën e komunikimit me qytetarët.
Më pas përmes një urdhri të paligjshëm dhe një ndërhyrje të paligjshme nga Policia e Shtetit është urdhëruar shoqërimi me dhunë në Drejtorinë e Policisë së Fierit, të kandidatit për deputet të partisë më të madhe të opozitës, duke synuar intimidimin e tij dhe pengimin për të ushtruar të drejtën e tij për të bërë fushatë sipas formave që i zgjedh secili kandidat.
Ky akt përbën një tejkalim të pashembullt mes shtetit dhe partisë. Ka vetëm një qëllim, të intimidojë kandidatët e opozitës në javën e fundit dhe vendimtare të zgjedhjeve të 11 majit. Asnjë nga kandidatët e PD dhe Aleancës për Shqipërinë Madhështore në Qarkun e Fierit, as intimidohet as nuk impresionohet nga shkelja brutale e ligjit nga ana e punonjësve të veshur me uniformën e Policisë së Shtetit.
Qëllimi i tyre nuk është të intimidojnë një javë para zgjdhjeve mua apo kandidatëve për deputetë, por mes dhunës së ushtruar ndaj kandidatëve për deputetë, ka vetëm një qëllim të intimidojë dhe frikësojë qytetarët e Qarkut Fier, që të votojnë të lirë dhe të bëjnë zgjedhjen e tyre në mënyrë demokratike pas një jave në 11 maj.
Sot dua t’i jap një paralajmërim të prerë drejtuesve të Policisë në Qarkun Fier, në mënyrë të përsëritur keni provokuar kandidatët për deputetë të opozitës në Qarkun e Fierit. Në mënyrë të përsëritur, ne kemi të dhëna që i kemi depozituar, që jeni të përfshirë në fushatë për llogari të një kriminele dhe të korruptuare dhe kriminele si Belinda Balluku dhe ky është momenti që duhet të ndërprisni çdo veprimtari të paligjshme ndaj opozitës, qytetarë dhe mbështetësve të PD dhe të zbatoni me përpikmëri vetëm detyrën tuaj dhe ligjin. Hiqni dorë nga metodat dhe format e ngjashme me sigurimin e shtetit. Hiqni dorë nga përdorimi politik për të frikësuar opozitën dhe qytetarët opoziarë, hiqni dorë nga veprimet kriminale. Pas 11 majit nuk do të ketë as Edi Rama as Belinda Balluku që t’ju dalë për zot.”
Ngjarja ndodhi pasi Semanjaku kundërshtoi heqjen e një banderole elektorale të vendosur nga strukturat e PD, duke akuzuar bashkinë për pengim të fushatës. Për të shmangur përshkallëzimin e situatës, raportohet se forcat e policisë ndërhynë dhe e shoqëruan kandidatin demokrat në komisariat, ku pas disa minutash ai është lënë i lirë.
Lexo edhe:
Shoqërohet në komisariat kandidati i PD në Fier, reagon policia: Ja çfarë ndodhi (PAMJET)
