Në intervistën e gjerë që u transmetua të dielën në NBC, Donald Trump nuk përjashtoi përdorimin e forcës ushtarake për të marrë Groenlandën, ndërsa tha se ishte “shumë e pamundur” që ai ta bënte këtë me Kanadanë.
Trump, i cili së shpejti supozohet të takohet me kryeministrin e ri kanadez, Mark Carney, tha se nuk do të pushonte së foluri për Kanadanë si shtet i 51-të, duke sugjeruar se “do të ishte një shtet i dashur” duke hedhur poshtë rëndësinë e tij si një aleat tregtar edhe pse është një nga partnerët më të mëdhenj tregtarë të SHBA-së.
“Ne nuk kemi nevojë për makinat e tyre, nuk kemi nevojë për lëndë druri, nuk kemi nevojë për energjinë e tyre. Ne nuk kemi nevojë për asgjë. Ne bëjmë shumë pak biznes me Kanadanë. Ata e bëjnë të gjithë biznesin e tyre praktikisht me ne. Ata kanë nevojë për ne. Ne nuk kemi nevojë për ta” – tha Trump.
Por kur u pyet për forcën ushtarake, ai tha se “është shumë e pamundur” por shtoi se “nuk e përjashtoj” në lidhje me Groenlandën.
“Unë nuk them se do ta bëj, por nuk përjashtoj asgjë. Ne kemi shumë nevojë për Groenlandën. Groenlanda është një numër shumë i vogël njerëzish, për të cilët ne do të kujdesemi dhe do t’i vlerësojmë ata dhe të gjitha këto. Por ne kemi nevojë për së pari për sigurinë ndërkombëtare” – deklaroi Trump.
Trump gjithashtu minimizoi komentet e tij të mëparshme që sugjeronin idenë e kandidimit për një mandat të tretë. “Kjo nuk është diçka që unë po kërkoj të bëj,” – tha ai në intervistën për NBC.
“Unë po kërkoj të kem katër vite të shkëlqyera dhe t’ia dorëzoj dikujt, në mënyrë ideale një republikani të madh, një republikan të madh për ta çuar përpara,” tha ai. “Por unë mendoj se do të kemi katër vite dhe mendoj se katër vite janë mjaft kohë për të bërë diçka vërtet spektakolare”.
Ai nuk pranoi të përmendte kë e sheh si pasardhësin e tij, por tha se “JD Vance po bën një punë fantastike” dhe se zëvendëspresidenti i tij “do të kishte një avantazh”.
Por ai gjithashtu përmendi Rubion, duke e quajtur atë “të madh”. Rubio ka pasur një rritje të jashtëzakonshme brenda orbitës së Trump, duke u parë si një kanal jetik për presidentin. Javën e kaluar, Rubio u caktua për të zëvendësuar këshilltarin e rrëzuar të sigurisë kombëtare, Michael Waltz, përveç shërbimit si diplomati më i lartë i vendit.
Trump përsëriti kritikat e tij ndaj kryetarit të Rezervës Federale, Jerome H. Powell, për mosuljen e normave të interesit dhe sugjeroi se kjo ishte për shkak të armiqësisë personale, por nuk do të përpiqet ta largojë atë përpara se mandati i Poëell të përfundojë në 2026.
