Presidenti francez Emmanuel Macron ka reaguar me tone të forta ndaj një serie sulmesh të koordinuara ndaj burgjeve penitenciar në Francë, duke premtuar se autorët do të “gjenden, gjykohen dhe ndëshkohen”.
Deklarata e tij vjen pas më shumë se një duzine incidentesh të ndodhura brenda tri ditëve të fundit. Ndër më seriozet ishte një sulm me armë automatike në hyrje të burgut të Toulon në jug të vendit. Në ngjarje të tjera janë raportuar djegie makinash, vandalizëm dhe përpjekje për zjarrvënie në akomodimet e gardianëve të burgut.
Në disa prej këtyre akteve është lënë gjurmë edhe një akronim: DDPF – “Mbrojtja e të Burgosurve Francezë”, një grup që duket se po merr përgjegjësinë për sulmet. Le Parisien raportoi arrestimin e një të burgosuri me lirim me kusht në rajonin e Essonne, i cili dyshohet se është i përfshirë në një grup të koduar në Telegram të lidhur me sulmet.
Në një mesazh të publikuar në emër të DDPF-së, thuhet: “Ne nuk jemi terroristë, ne jemi këtu për të mbrojtur të drejtat e njeriut brenda burgjeve.” Megjithatë, Telegram ka fshirë mesazhet, duke deklaruar se përmbajtja që përmban thirrje për dhunë është “rreptësisht e ndaluar”.
Mediat franceze po e përshkruajnë këtë valë incidentesh si një “shpallje lufte” nga kartelet e drogës, në kohën kur qeveria ka paralajmëruar masa të forta kundër trafikantëve dhe ka ashpërsuar kushtet në burgje për bosët e drogës që veprojnë nga brenda mureve të institucioneve penitenciare.
Ministri i Drejtësisë, Gérald Darmanin, njoftoi se këtë verë planifikohet transferimi i 200 trafikantëve të dënuar në burgje me siguri ultra të lartë. Ata do të izolohen dhe do të kenë qasje të kufizuar ndaj vizitorëve dhe komunikimit telefonik, në përpjekje për të ndërprerë rrjetet e tyre kriminale.
Situata mbetet e tensionuar dhe autoritetet franceze janë në gatishmëri të lartë për të shmangur përshkallëzimin e mëtejshëm të dhunës.
