Agjentët e BKH-së dhe efektivët e Policisë së Shtetit ndërmorën mëngjesin e sotëm një aksion me urdhër të SPAK, duke ushtruar kontroll në banesën e Drejtorit të Ujësjllësit të Elbasanit, Luan Tabaku, si dhe në zyrat e një biznesi në Elbasan, i cili operon në fushën e ndërtimit.
Dyshohet se ata janë të lidhur me personazhin e krimit të organizuar Suel Çela, teksa urdhër-kontrollet ishin firmosur nga prokurori i posaçëm, Vladimir Mara.
Por, sipas anëtarët të Kryesisë së PD, Belind Këlliçi, SPAK kishte urdhër për të ushtruar kontroll edhe në tregun agro-ushqimor në Elbasan, në pronësi të babai të Suel Çelës, urdhër i cili u refuzua të zbatohej nga Policia e Shtetit.
Në një deklaratë nga selia blu, Këlliçi tha se Policia nuk ka zbatuar detyrën si institucion i shtetit, por urdhrin e Edi Ramës dhe sipas tij, ky është një veprim jo vetëm në kundërshtim me ligjin, por edhe dëshmi e dorëzimit të shtetit në duart e krimit të organizuar.
Këlliçi deklaroi se Rama e shtyn dhe e frymëzon SPAK kur ka nevojë, dhe i vihet kundra, e poshtëron kur i prek interesat.
Deklarata e anëtarit të kryesisë së PD, Belind Këlliçi:
Sot policia e Prodës nuk ka zbatuar detyrën si institucion i shtetit, por urdhrin e kreut të narko-qeverisë, Edi Rama.
Narko-drejtori ka refuzuar të zbatojë një urdhër të Prokurorisë së Posaçme për të kontrolluar tregun e Elbasanit, bazën e aktiviteteve të paligjshme të bandës kryesore të Ramës dhe PS në rajon, grupit të Suel Çelës.
Ky është një veprim jo vetëm në kundërshtim me ligjin, por edhe dëshmi e dorëzimit të shtetit në duart e krimit të organizuar.
Rama e shtyn dhe e frymëzon SPAK kur ka nevojë, dhe i vihet kundra, e poshtëron kur i prek interesat.
Ky është standardi i tij me drejtësinë dhe Europën.
Më shumë se kaq, kjo është përpjekje e hapur e Edi Ramës, që me anë të bandave të kontrollojë e vjedhë dhe këto zgjedhje.
I alarmuar nga qëndrimi i Këshillit të Europës dhe Parlamentit Europian në takimet me liderin e opozitës Sali Berisha, Edi Rama po ruan të paprekur infrastrukturën kriminale të grabitjes së zgjedhjeve.
Partia Demokratike u bën thirrje aleatëve ndërkombëtarë të reagojnë për këtë faqe të errët ne librin e zi të rekordeve të Ramës dhe qeverisë së tij.
Rama, që ka banditët në krah, ka popullin kundër.
Më 11 maj, të kthejmë shtetin në anë të qytetarit dhe të së drejtës dhe Ramën ta hedhim në koshin e plehrave të historisë!
