Dy vëllezër janë arrestuar nga policia e Tiranës, pasi një ditë më parë dhunuan një 41-vjeçar dhe më pas i vodhën makinën në zonën e Yzberishtit.
Sipas policisë, në pranga kanë rënë dy vëllezërit me iniciale B. H., 44 vjeç dhe E. H., 36 vjeç, të dy banues në Tiranë, të cilët për motive të dobëta kanë dhunuar shtetasin me iniciale I. Zh., 41 vjeç, në garazhin e një pallati në Yzberisht dhe më pas i kanë marrë automjetin,
Blutë njoftojnë se automjeti i vjedhur u gjet afër banesës së 2 vëllezërve dhe u sekuestrua në cilësinë e provës materiale.
“Shërbimet e Komisariatit të Policisë Nr. 6, ditën e djeshme, pas marrjes së njoftimit se një shtetas e kishin dhunuar dhe më pas i kishin marrë automjetin, kanë organizuar operacionin e koduar “Motivi”, për zbardhjen e rastit, identifikimin dhe kapjen e autorëve.
Si rezultat i operacionit, u lokalizuan, u kapën dhe u vunë në pranga shtetasit B. H., 44 vjeç dhe E. H., 36 vjeç, të dy banues në Tiranë (vëllezër).
Nga hetimet dyshohet se këta shtetas, në garazhin e një pallati në Yzberisht, për motive të dobëta, kanë dhunuar shtetasin I. Zh., 41 vjeç, dhe më pas i kanë marrë automjetin atij.
Automjeti i vjedhur u gjet afër banesës së 2 vëllezërve dhe u sekuestrua në cilësinë e provës materiale.”– njofton policia.
Materialet procedurale iu referuan Prokurorisë së Tiranës, për veprime të mëtejshme, për veprën penale “Vjedhja me dhunë”, kryer në bashkëpunim.
