Dialogu mes Kosovës dhe Serbisë ka mbetur në vendnumëro, pasi prej tetëmbëdhjetë muajsh nuk ka patur asnjë takim të nivelit të lartë. Me të dyja vendet të përfshira nga sfidat e brendshme, marrëveshja përfundimtare duket e largët.
Ndaj analistët në Kosovë vlerësojnë se në këto kushte nga Prishtina duhet një strategji e qartë dhe unitet nga partitë politike.
“Jo vetëm partia ose Kryeministri i ardhshëm, por të gjithë subjektet politikë duhet të ulen në një tryezë që duhet të udhëheqë presidentja e Kosovës dhe ta bëjë një strategji të qartë dhe sa i përket me dialogun dhe me Serbinë dhe sa i përket me integrime dhe me aleancat”, shprehet politologu Argjend Zejnaj.
Emërimi i një emisari të ri për dialogun nga BE-ja shihet si pozitiv dhe që do t’i japë një shtysë të re dialogut mes të dyja vendeve.
“Do të jetë presion, e pamë edhe vizitën e fundit të dërguarit të ri të BE-së, dhe ky do të jetë më kompetetivë sa i përket lehtësimit të dialogut të Kosovës me Serbinë, për të ardhur deri në një konkluzion të marrëveshjes finale.”
Me interes pritet qëndrimi që do të mbajë Uashingtoni sa i përket dialogut, pasi sipas analistëve një angazhim i drejtpërdrejtë i SHBA-së në këtë proces do t’i vëjë palët para një përgjegjësie më të madhe për të arritur marrëveshjen finale.
