Policia e Peqinit ka arrestuar dy persona, të cilët pas një hetimi disamujor, kanë rezultuar se janë autorë të vjedhjeve të 6 banesave, të ndodhura përgjatë 2 viteve.
Në kuadër të operacionit të koduar “Revealed” janë vënë në pranga shtetasit shtetasit Artur Ciku, 38 vjeç, banues në fshatin Mjekës, Elbasan, i dënuar më parë po për vjedhje, dhe Idajet Sulkja, 48 vjeç, banues në Durrës
Ata dyshohet se kanë grabitur 8 banesa të pa banuara në disa fshatra të Peqinit, për shkak se pronarët jetonin jashtë vendit.
Policia ka proceduar penalisht dhe shtetasin A. Q., 49 vjeç, banues në fshatin Mjekës, pasi dyshohet se me automjetin e tij ka bashkëpunuar në transportimin e sendeve të vjedhura.
Gjithashtu, nën hetim është vënë dhe shtetasi K. B., 65 vjeçe, që dyshohet se ka pasur dijeni për krimin dhe nuk ka kallëzuar, pasi u kishte dhënë me qira një ambient autorëve që ata e përdornin për grumbullimin e sendeve të vjedhura.
Ndërkohë, në kërkim është shpallur shtetasi B. H., 33 vjeç, banues në Durrës, i cili dyshohet se ka bashkëpunuar me hajdutët, pasi ka përdorur automjetin e tij për mundësimin e vjedhjeve.
Autoritetet raportojnë se uniformat blu kanë gjetur dhe sekuestruar 4 televizorë, 5 kondicionerë, 6 biçikleta, orendi shtëpiake, pajisje të ndryshme elektronike dhe elektrike, bizhuteri, fishekë luftarak dhe 1 automjet i përdorur nga autorët për mundësimin e vjedhjeve.
Materialet procedurale i kanë kaluar Prokurorisë së Elbasanit për veprime të mëtejshme.
