Prej disa ditësh faqja zyrtare e Agjencisë së Prokurimit Publik, në të cilën zhvillohen online procurat e tenderave ka probleme. Më konkretisht, hapet faqja e parë por nuk aksesohet asnjë dokumentacion si blerje e vogël, njoftim kontrate, njoftim fituesi, lidhje kontrate apo procedurë e arkivuar. Në adresë të emisionit “Xhadat„ erdhën video në ditë dhe orare të ndryshme, që tregojnë se faqja, ka probleme me aksesin nga përdoruesit. Gazetarët provuan të njëjtën gjë si përdoruesit e tjerë dhe hasën të njëjtin problem. Përveç mospërmbushjes së kontratës për ofrim shërbimi, kjo cënon rëndë dhe një nga qëllimet e ligjit për prokurimin publik, të sigurojë integritet, besim publik dhe mbi të gjitha transparencë në procedurat e prokurimit publik. Ndërkohë ngrihet pyetja përse nuk ka asnjë njoftim nga ana e APP për këtë problem?
Shumë i çuditshëm duket fakti që edhe faqja e prokurimeve publike në Kosovë E-Prokurimi, po ashtu prej pak ditësh është jashtë funksionit. Komisioni Rregullativ i Prokurimit Publik atje ka lëshuar një njoftim, ku ka bërë me dije se kjo situatë ka ardhur si pasojë e disa problemeve teknike. Pyetja që lind në këtë rast është mos ndoshta jemi përpara një sulmi kibernetik?
Shoqëritë që prej vitesh kanë fituar tenderat e mirëmbajtjes së faqes së APP janë InfoSoft Systems sh.p.k & ikubINFO sh.p.k. Tenderi i fundit me këtë objekt është zhvilluar nga Agjencia Kombëtare e Shoqërisë së Informacionit në vitin 2023, me objekt “Shërbimi i mirëmbajtjes së sistemit të prokurimit publik për Agjencinë e Prokurimit Publik. Vlera e kontratës ishte 456.2 milionë lekë, fituar nga oferta e vetme në garë pra pa garë. Kohëzgjatja e tenderit është 24 muaj nga momenti i nënshkrimit të kontratës dhe sipas pagesave të thesarit, data e lidhjes së kontratës është 31 korrik.2023. Për pasojë data e përfundimit të kontratës është 31 korrik 2025. Pagesa e fundit për këtë shërbim në thesar është në bërë në datën 20 janar 2025. Në vitin 2020, AKSHI ka zhvilluar edhe tenderin me objekt “Blerje pajisje elektronike për Sistemin e Prokurimit Elektronik”, me vlerë kontrate 55.4 milionë lekë, fituar sërisht nga operatori i vetëm në garë Infosoft System.
Gazetarët e “Xhadave„ ju drejtuan Agjencisë së Prokurimit Publik për t`i pyetur se çfarë po ndodh, por këta të fundit të strehuar në godinën e Kryeministrisë, nuk u përgjigjën. E pyetur nga Xhadat Agjencia Kombëtare e Shoqërisë së Informacionit, nuk e pranoi problemin. Ajo tha se në institucionin e saj, nuk ka asnjë problem apo alert për sistemin e prokurimit publik.
Gazetarët u përpoqën të kontaktonin edhe dy kompanitë që kanë fituar tenderin e mirëmbajtjes së faqes, por edhe ata nuk dhanë asnjë informacion, ndonëse kanë përfituar rreth 450 milion lekë për këtë shërbim.
