Kryetari i Grupit Parlamentar të PD, Gazment Bardhi ka denoncuar aferën me TEC e lëvizshëm, Tigrat 1 dhe Tigrat 2, për të cilat thotë se zv.kryeministrja Belinda Balluku ka shpërdorur 80 milionë euro.
Sipas Gazment Bardhit, çdo firmë e hedhur nga Belinda Balluku ngre dyshime se ajo ka shpërdoruar paratë publike për përfitime personale.
Bardhi deklaroi se i ka kërkuar SPAK që të hetojë penalisht zv.kryeministren Belinda Balluku.
“Nuk ka asnjë rast në asnjë vepër të rëndësishëm që firma e saj të mos ngrejë dyshimin e parave publike dhe përfitimin personal sipas një skemë të paracaktuar. E tillë është edhe afera e termocentraleve të lëvizshëm Tigri 1 dhe Tigri 3 që u sollën me urgjencë për një krizë imagjinare energjitike.
Tigrat e Ballukut dhe Ramës nuk u vendosën në punë, duke provuar se qëllimi i tyre ishte shpërdorimi i dyshimtë i rreth 80 mln euro dhe jo furnizimi me energji elektrike.
Historia e termocentraleve të lëvizshëm për të cilën i kam kërkuar Prokurorisë të nisë hetimet penale për Ballukun dhe bashkëpunëtorët e saj është një histori e ngjashme me inceneratorët.
Tigrat nuk kryejnë asnjë funksion për të cilën u shpenzuan shumë para. Afëra e TEC lëvizës bie erë korrupsion, edhe pse i kam kërkuar SPAK të kryejë hetime penale për këtë aferë që u ka marrë nga xhepat shqiptarëve të paktën 80 mln euro”, tha Bardhi.
