Dy shqiptarët të shpallur në kërkim ndërkombëtar nga drejtësia shqiptare janë arrestuar në Gjermani dhe në Mbretërinë e Bashkuar.
Autoritetet policore raportojnë se në Gjermani është kapur shtetasi Danjel Lalaj, 21 vjeç, i lindur në Pukë, i cili ishte shpallur në kërkim nga SPAK. Këtij shtetasi GjKKO-ja, në vitin 2021, i ka caktuar masën e sigurisë “Arrest në burg”, për veprën penale “Prodhimi dhe shitja e narkotikëve”, kryer në kuadër të grupit të strukturuar kriminal;
Ndërkohë, në Mbretëri të Bashkuar është kapur shtetasi Bekim Çelaj, 25 vjeç, i lindur në Tropojë. Ndaj tij, gjykata në vitin 2022, ka caktuar masën e sigurisë “Arrest në burg”, për veprat penale “Kultivimi i bimëve narkotike” dhe “Mbajtja pa leje dhe prodhimi i armëve, armëve shpërthyese dhe i municionit”.
Policia thotë se Interpol Tirana vijon bashkëpunimin me homologët, për finalizimin e procedurave për ekstradimin e dy shtetasve të mësipërm në Shqipëri.
