Sali Berisha ka reaguar pas deklaratës së kryeministrit Rama, i cili në një lidhje të tensionuar me ndjekësit në Instagram e quajti konsulentin e PD-së për zgjedhje punëtor të Trump, teksa shigjetonte opozitën.
Berisha theksoi Chris LaCivita të cilin rama e quan punëtor, është njëkohësisht kryetar i komitetit kombëtar të Partisë Republikane të Donald Trump.
“Ai personi, të cilin Edi Rama e quajti punëtor i Donald Trump sikur të ishte kopshtar apo lulishtar në Mar-A-Lago është njëkohësisht kryetar i komitetit kombëtar të Partisë Republikane të Donald Trump. Dhe ai foli aty në cilësinë e bashkëkryetarit të menaxhimit të fushatës më të suksesshme në histori, por foli edhe në cilësinë e kryetarit të Komitetit Kombëtar Republikan”.
Berisha shprehet se Chris LaCivita zgjodhi PD-në për të vazhduar betejën kundër Sorosit dhe ekstremit të majtë të tij.
Berisha thekson se vendimi i tij ishte një akt politik dhe shton se pasi i prenë kokën gjarprit në Uashington, duhet t’ia presin edhe tentakulat në Shqipëri.
“Çdo shqiptar duhet ta ketë të qartë se Chris LaCivita në kërkesën planetare që ekziston, në qindra kërkesa nga i gjithë planeti, që ekzistojnë për të bashkëpunuar me të, ai fisnikërisht zgjodhi Partinë Demokratike të Shqipërisë. Zgjodhi PD-në jo rastësisht. Për kryetarin e Komitetit Kombëtar Republikan dhe Partinë Republikane që ai përfaqëson, Edi Rama është një kukull e Xhorxh Sorosit. Dhe ai, që ta kemi shumë të qartë, erdhi këtu për të vazhduar betejën që fitoi në SHBA, kundër Sorosit dhe ekstremit të majtë të tij. Pra, ishte një akt kryekëput politik pasi i prenë kokën gjarprit në Uashington, duhet t’ia presin tentakulat kudo, dhe në Shqipëri ato ishin dhe janë më të zhvilluara se në asnjë vend tjetër”.
