Gjykata e Durrësit ka dënuar me 10 vite burgim Xhemal Lokës, i cili akuzohet se ka çuar drejt vetëflijimit bashkëshorten e tij, Bedrie Loka. Kjo e fundit, në gjendje të rënduar psikologjike, më 2 Janar të vitit të kaluar, piu helm dhe gjeti vdekjen një ditë më pas në spital.
Xhemal Loka është shpallur fajtor nga Gjykata për veprat “Shkaktimi i vetëvrasjes” dhe “Mbajtja pa leje dhe prodhimi i armëve, armëve shpërthyese dhe i municionit”. Vendimi është dhënë nga gjyqtari Shkëlzen Liçaj.
Gjatë kontrollit në banesë, Xhemal Lokës iu gjet dhe një armë zjarri automatike PPS me nr.89-0579, e cila është konfiskuar dhe do të kalojë në favor të shtetit.
Bedrie Loka dyshohet se e mori aktin ekstrem për të konsumuar helm nga dhuna fizike dhe psikologjike që bashkëshorti i saj, Xhemal Loka ushtronte ndaj saj. Gjithashtu, ai e akuzonet 41-vjeçaren dhe për tradhti bashkëshortore, lidhur me një adresë të rreme që ishte hapur në TikTok dhe shkruante ndaj saj.
Ngjarja ndodhi në fshatin Vadardhë të Sukthit, teksa çifti ishin dhe prindër të 4 fëmijëve. Kanë qenë dëshmitë e fëmijëve ato të cilat e rënduan edhe më shumë pozitat e Xhemal Lokës në gjykatë. Ata kanë rrëfyer për dhunën që babai i tyre ushtronte ndaj mamasë së tyre dhe akuzat ndaj kësaj të fundit.
Ditën kur 41-vjeçarja ndërmorri aktin e vetëflijimit, në katin e parë të banesës ku ajo jetonte janë gjetur një shishe plastike me ujë dhe disa kapsula fotoksinë, të cilat i kishte konsumuar Bedrie Loka. Disa orë pas ngjarjes, në media u publikuan disa pamje të filmuara nga djali i çiftit ku tregohej pikërisht dhuna që Xhemal Loka ushtronte ndaj të shoqes.
Hetuesit kanë dalë në konkluzionin se keqtrajtimi sistematik ndaj të ndjerës, e ka çuar atë në vetëvrasje.
