Kompania ajrore e fluturimeve “Wizz Air” ka anuluar linjën Tiranë – Brindisi. “Confesercenti Nazionale”, një nga organizatat më të mëdha të biznesit në Itali, ka shprehur shqetësim të madh për pasojat negative që do të ketë ky vendim mbi ekonominë e rajonit të Salentos.
Media italiane “Gazzetta del Mezzogiorno” shkruan se ky itinerar, ka pasur sukses të madh dhe fluturime të mbushura plot, siguronte një lidhje jetike mes Shqipërisë dhe rajonit të Salentos.
Organizata ka reaguar ashpër ndaj anulimit të kësaj linje, e cila duket se vjen si pasojë e vështirësive financiare të kompanisë, përfshirë kostot më të larta se pritshmëritë dhe rritjen e numrit të avionëve të mbetur në tokë për shkak të problemeve me furnizimin e motorëve.
“Ky vendim po shkakton shqetësim të madh tek turistët dhe frikë të konsiderueshme tek operatorët ekonomikë të Salentos, të cilët përfitonin nga ky shërbim transporti”, thekson Confesercenti.
Anulimi i linjës Tiranë-Brindisi duket se ndjek të njëjtën tendencë si reduktimi i ndalesave të anijeve turistike në portin e Brindisit. “Besojmë se rajoni ynë nuk mund të pranojë në mënyrë pasive vendime që dëmtojnë aksesin dhe konkurrueshmërinë e Salentos”, thekson shoqata.
Mbyllja e kësaj linje ajrore pritet të ndikojë drejtpërdrejt në disa sektorë kyç, përfshirë hotelerinë, restorantet, transportin dhe tregtinë, të cilat varen ndjeshëm nga flukset turistike dhe mobiliteti ndërkombëtar.
