Struktura e Posaçme Anti-Korrupsion (SPAK) ka reaguar në lidhje me akuzat e Tedi Blushit se ky institucion kishte penguar dhunshëm deputetin Vangjel Dule dhe eurodeputetin Fredi Beleri për të takuar Ilir Metën në paraburgimin “313” në kryeqytet.
Përmes një komunikate për mediat, SPAK shfajësohet duke thënë se miratimi i lejës në rastet e deputetëve jepet nga Drejtoria e Burgjeve dhe nuk duhet një autorizimin paraprak nga prokurori i çështjes.
Gjithashtu, SPAK thotë se në protokolllin e Prokurorisë së Posaçme nuk ka mbërritur asnjë kërkesë nga Vangjel Dule dhe Fredi Beleri për të takuar ndonjë të paraburgosur.
Reagimi i plotë i SPAK:
Në bazë të nenit 51 të ligjit nr.81 të vitit 2020 “Për të Drejtat dhe Trajtimin e të Dënuarve me Burgim dhe të Paraburgosurve”, institucionet e ekzekutimit të vendimeve penale mund të vizitohen nga deputetë, pa autorizimin paraprak të Prokurorit.
Në këtë rast, miratimi jepet nga Drejtoria e Përgjithshme e Burgjeve.
Deri në orën 15:15 të dt.31.01.2025, në protokollin e Prokurorisë së Posaçme Kundër Korrupsionit dhe Krimit të Organizuar nuk ka mbërritur asnjë kërkesë nga shtetasit Alfred Beleri dhe Vangjel Dule për të takuar ndonjë të paraburgosur.
