Policia e Vlorës ka arrestuar një person, i cili akuzohet si i përfshirë në atentatin e regjistruar pasditen e 13 Janarit në autostradën Fier-Vlorë, ku u ekzekutua 30-vjeçari Kristian Marku alias Bardhi nga Rrësheni.
Në pranga është vënë shtetasi Erald Cenaj, 36 vjeç, lindur dhe banues në Kukës, i dyshuar për veprën penale “Sigurimi i kushteve dhe mjeteve materiale për të kryer vrasje”.
Autoritetet policore raportojnë se nga tërësia e veprimeve hetimore të kryera deri tani u arrit të dokumentohej se automjeti i përdorur nga autorët për vrasjen e Kristian Markut (Bardhit) është siguruar nga Erald Cenaj.
Po ashtu, bëhet me dije se gjatë periudhës hetimore janë kryer veprime dhe janë sekuestruar prova që i shërbejnë hetimit me qëllim zbardhjen e ngjarjes.
Burime për mediat bëjnë me dije se grupi hetimor ka kërkuar ndihmën e INTERPOL-it për të identifikuar dhe lokalizuar autorët e dyshuar, pasi ekzistojnë indicie se ata janë larguar drejt Kosovës pas kryerjes së atentatit.
Policia shqiptare po punon intensivisht me autoritetet kosovare, por informacion nëpërmjet INTERPOL i është kërkuar edhe shteteve të tjera.
Dyshohet se ekzekutimi është realizuar duke përdorur dy automjete. Njëri prej mjeteve ka shërbyer për realizimin e atentatit, ndërsa tjetri për largimin e autorëve, pas djegies së automjetit të parë. Nga dinamika e ngjarjes, dyshohet se atentati është realizuar nga vrasës profesionistë që kanë menduar çdo gjë me detaje, përfshirë dhe rrugën e arratisjes.
Grupi hetimor dyshon se ndjekja e makinës së Kristian Markut ka nisur që në afërsi të rrethrrotullimit të Levanit, për ta ekzekutuar më pas pranë nënkalimit të Novoselës. Viktima ka qenë duke udhëtuar në drejtim të Vlorës me një automjet tip “Volkswagen Passat”, në momentin kur autorët i kanë dalë paralel me një automjet tip “Golf” dhe e qëlluan për vdekje.
Bëhet me dije se Kristian Marku ishte ndjekur për disa ditë me radhë përpara se të ndodhte ngjarja. Ai kishte marrë një automjet me qira në Tiranë, ç’ka sugjeron se lëvizjet e tij ishin nën vëzhgim të vazhdueshëm nga autorët.
Deri më tani, pistë kryesore mbetet ajo e hakmarrjes me fisin Reçi në Mirditë, përplasje e nisur që me ngjarjen e 26 Marsit të vitit 2023, ku u qëllua me armë zjarri drejt Saimir Reçit, nipit të Kastriot Reçit, i vrarë në Janar 2020 me snajper në qendër të Rrëshenit. Ndërkohë, në shtator të vitit 2023, Kristian Markut i vranë edhe xhaxhain, Martin Bardhi.
