Gjykata e Asizeve të Ankonës në Itali ka dënuar me 18 vite burgim 28-vjeçarin algjerian Fatah Melloul, i cili është shpallur fajtor si autor i vrasjes së 23-vjeçarit shqiptar Klajdi Bitri, ngjarje kjo e ndodhur më 27 gusht 2023, në via Cilea, Sirolo. I riu u godit me një shtizë peshkimi, teksa ndërhyri gjatë konlfikti për të mbrojtur miqtë e tij.
Mediat italiane raportojnë se Gjykata përjashtoi “rrethanat rënduese” dhe “motive të dobëta”, teksa prokurori Marco Pucilli kishte kërkuar dënimin prej 24 vjetësh me burgim për autorin.
Gjykata, e kryesuar nga gjyqtari Roberto Evangelisti, e dënoi të akuzuarin, i mbrojtur nga avokati Davide Mengarelli, gjithashtu të paguajë një kompensim prej 40 mijë euro për prindërit e të riut, palë civile me avokaten Marina Magistrelli.
Vendimi u dha pak para orës 15:00, të 21 janarit, pas gati tre orësh në dhomën e këshillimit. Në sallën e gjyqit ishte sjellë edhe shtiza e peshkimit me të cilën ishte kryer krimi.
Si ndodhi vrasja?
Ishte herët pasdite kur në rrethrrotullim pati një debat për problemet e trafikut. Ishte krijuar një bllokim trafiku dhe pas disa fyerjeve, ku kishin përfshirë edhe miq dhe të afërm të viktimës (në dy makina të ndryshme ndodheshin punëdhënësi i 23-vjeçarit, gruaja, vëllai i tij), 28-vjeçari ishte kthyer në makinë për të marrë shtizën e peshkimit dhe ia drejtoi të riut që kishte mbetur i plagosur në gjoks. Shqiptari ndërroi jetë pak minuta më vonë. Algjeriani (i cili ishte me të dashurën e tij atë ditë) tashmë ishte futur në makinë dhe ishte larguar. Ai u arrestua para darkës, në Falconara, nga karabinierët, duke u kthyer nga peshkimi. I pandehuri gjithmonë ka pohuar se nuk e kishte kuptuar që e kishte vrarë.
Klajdi Bitri ishte një djalë që ishte integruar në mënyrë perfekte në Itali, punonte për të mbështetur vëllain e tij më të vogël dhe dy prindërit që jetojnë në Lushnje.
