E treta e vërteta. Pasi dështoi dy herë gjatë vitit të kaluar, tenderi për ndërtimin e godinës së SPAK më në fund duket se është finalizuar.
Prokuria e Posaçme ka shpallur fitues një bashkim kompanish të udhëhequr nga 2T, në tenderin 3.95 milionë euro. Sipas dokumentave të publikuar në Agjencinë e Prokurimeve Publike, “K.A.E.XH” shpk, “2 T” shpk dhe “A E S S” shpk u shpallën fituese në garën, ku pati vetëm dy oferta duke ofruar çmimin 3.71 milionë euro. Oferta tjetër ishte ajo e shoqërisë ULZA, e cila ofroi çmimin 3.89 milionë euro.
Vitin e kaluar SPAK tentoi dy herë të kontraktonte një ndërtues për godinën e institucionit. Por në të dy rastet tenderi dështoi për shkak të mosparaqitjes së ofertave të përshtatshme. Këtë herë procedura është finalizuar.
2T është një kompani, e cila zotërohet nga dy aksionerë. Artan Sako, vëllai i ish komandantit të Gardës dhe Dritan Troksi, zotërojnë secili nga 50 për qind të aksioneve të kompanisë. Vetëm dy muaj më parë, Sako u thirr në SPAK për t’u pyetur nga prokurorët e posaçëm. Por arsyet e thirrjes së tij nuk u bënë publike, nëse Sako ishte pjesë e ndonjë hetimi apo ishte thirrur si person në dijeni.
2T është një nga kontraktorët më të mëdhenj të qeverisë shqiptare. Sipas të dhënave nga thesari, në pesë vitet e fundit kjo kompani ka marrë mbi 70 milionë euro pagesa nga institucionet publike. Ndërkohë paralelisht, kompania është denoncuar nga opozita si ndërtuesja e pallatit familjar të kryeministrit Edi Rama në ish Bllok.
“A nuk duhet qytetarët të dinë për të gjitha këto si u ndërtua pallati 5 katësh në sheshin e pallateve nga Linda Rama dhe familja e saj, për të cilën nuk ekziston asnjë faturë tatimore, doganore ose bankare,” akuzoi Berisha.
Godina e re
Tenderi synon përshtatjen e një godine të sapo-ndërtuar, e cila fillimisht ishte përcaktuar për administratën e Ujësjellësit të Tiranës, në një zonë shumë pranë Gjykatës së Posaçme.
Godina disa-katëshe, e cila ka kushtuar mbi 4 milionë euro për ndërtim, iu kalua nën administrim Prokurorisë së Posaçme, pas një marrëveshjeje mes Ministrisë së Drejtësisë dhe Bashkisë së Tiranës.
Objekti, megjithëse i ri, nuk ka një arkitekturë të brendshme shumë funksionale për t’u shndërruar në zyra të Prokurorisë së Posaçme. Për këtë arsye, qeveria shqiptare miratoi kërkesën e SPAK-ut për buxhet, me qëllim, rikonstruksionin e saj dhe përshtatjen për ambjente për prokurorët dhe oficerët e Byrosë Kombëtare të Hetimit.
Pjesë e projektit të përshtatjes është edhe ndërtimi i një tuneli mbi-tokësor, i cili do të lidhë godinën e re të SPAK-ut me ambjentet e Gjykatës së Posaçme./kapitali.al
