Deputeti socialist, Nasip Naço ka reaguar lidhur me akuzat që i penduari i drejtësisë Nuredin Dumani, gjatë seancës në GJKKO për dosjen “Plumbi i Artë”.
Dumani deklaroi para Gjykatës, në një seancë më dyer të mbyllura, se për t’u liruar nga burgu në vitin 2014 e ndihmoi dhëndri i vëllati të Nasip Naços, kohë kur ky i fundit mbante postin e ministrit të Drejtësisë. Ai deklaroi se ndërmjetës ishte avokati Alban Bengasi dhe se për lirimin pagoi shumën prej 40 mijë eurosh.
Përmes një postimi në rrjetet sociale, Nasip Naço e konsideron si një mashtrim për të dëmtuar integritetin e tij, duke pretenduar se akuzat publike nuk përputhen me faktet reale të punës së tij si ministër i Drejtësisë.
Në këtë mënyrë, Naço e konsideron si mashtruar të penduarin e drejtësisë, Nuredin Dumanin, duke vënë në dyshim me dhjetra krime që ka rrëfyer ai. Duke quajtur mashtrues Nuredin Dumanin, vihet në dyshim i gjithë procesi i dosjes “Plumbi i Artë”, që konsiderohet si një nga sukseset kryesore të SPAK për goditjen e krimit të organizuar.
Nasip Naço kërkon që të kryhet një hetim i thelluar mbi këtë rast dhe sipas tij, nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje.
Reagimi i plotë:
Jam njohur sot nga mediat ku përmendet emri im. Dua të theksoj se:
1. Distancohem nga çdo akuzë e bërë publike sot dhe ftoj organet e drejtësisë që të kryejnë një hetim të thelluar mbi këtë rast. Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje.
2. Roli i Ministrit të Drejtësisë, sipas legjislacionit në fuqi, është i kufizuar. Ministri:
– Nuk heton,
– Nuk ngre akuza,
– Nuk pushon çështje,
– Nuk jep vendime fajsie apo pafajsie.
Detyra e tij lidhet vetëm me dhënien e lejeve të veçanta për të dënuarit, bazuar në ligj.
3. Gjatë ushtrimit të detyrës sime si Ministër i Drejtësisë, nuk kam miratuar asnjë leje të veçantë për subjektin në fjalë.
4. Distancohem nga çdo mashtrim, i bërë nga kushdo, individualisht apo në bashkëpunim, për të dëmtuar integritetin tim. Akuzat publike të bëra sot nuk përputhen me faktet reale të ushtrimit të detyrës sime si Ministër.
Faleminderit!
