Është arrestuar për herë të dytë në Dubai, Soni alias Elson Reçi, njëri nga anëtarët kryesorë të grupit “Reçi” në Rrëshen.
Fillimisht Reçi u arrestua nga policia e Dubait në muajin Gusht, por pas disa ditë qëndrim në burg, ai u lirua nga qelia me kushtin e paraqitjes në Polici.
Ndërkohë në datën 2 Janar 2025, mësohet se Soni Reçi është riarrestuar nga policia e Dubait, pas dyshimeve se ka thyer kushtet. SPAK ka lëshuar një mandat arresti për Soni Reçin, lidhur me atentatin me tritol kundër Preng Gjinit të zhvilluar në vitin 2020 në Tiranë.
Autoritet Shqiptare, kanë kërkuar nga Emiratet e Bashkuara Arabe, ekstradimin e Soni Reçit, por kjo kërkesë ende nuk është shqyrtuar nga Drejtësia e këtij vendi.
SPAK e akuzon Reçin si porositësin e këtij atentati. Ai rezulton të ketë kontraktuar 6 persona për të kryer shpërthimin e komanduar ndaj Gjinit. Ky i fundit mbeti i plagosur rëndë nga ngjarja në fjalë.
Atentati ndaj Preng Gjinit, lidhet me sagën e hakmarrjeve mes dy fiseve Reçi dhe Gjini. Elson Reçi, është nipi i Kastriot Reçit, i vrarë me snajper nga një tarracë pallati në Janar të 2020.
Elson Reçi, u shpall në kërkim nga SPAK pas operacionit “Metamorfoza 3”, që u finalizua më 17 Maj të 2024. Në total nga kjo dosje u nxorën 50 urdhër-arreste, për pjesëtarë të 7 grupeve kriminale./Ora News
EMRI/ Me kallash në dorë, ky është “killeri” i vrasjes së fundit në Mirditë, ndodhet në Dubai
