Gazetari Artan Hoxha ka publikuar në emisionin “Opinion” disa foto të autorit të vrasjes së fundit të regjistruar në Mirditë. Ai shihet në mes të qytetit me armë zjarri kallashnikov në dorë.
Sipas Artan Hoxhës, personi në imazh është “Soni”, që tashmë ndodhet në Dubai. Bëhet fjalë për Edison Reçin, nipin e biznesmenit të vrarë me snajper Kastriot Reçit.
Ai u shpall në kërkim në operacion e fundit nga SPAK, pasi nga bisedat në aplikacionin “Sky Ecc” rezulton si porositësi dhe organizatori i atentatit të 15 Majit 2020 me bombë me telekomandë ndaj Preng Gjinit. Shpërthimi ndodhi sapo makina u fut në urën e Nisharakut në Tiranë, duke sjellë plagosjen e rëndë të Preng Gjinit. Ai iu nënshtrua një ndërhyrjeje të gjatë kirurgjikale dhe mjaft delikate, për shkak të dëmtimeve të shumta.
Ndërkohë, sa i përket imazheve të publikuara nga Artan Hoxha, duke se gazetari i referohet vrasjes së Martin Bardhit (Markut), i cili u ekzekutua më 26 shtator 2023 në lokalin e tij që ndodhet në hyrje të spitalit të Rrëshenit, 50 metra përballë komisariatit të qytetit.
Vrasja dyshohet se ndodhi për hakmarrja mes fiseve në Rrëshën. Viktima një muaj para se të vritej ishte liruar nga paraburgimi pasi ishte arrestuar për tentativën vrasje ndaj Saimir Reçit, nipit të Kastriot Reçit ndodhur më parë 26 mars 2023.
“Ka ndodhur vrasje në Mirditë. Janë vrarë dy veta tek spitali. Kjo duhet të ketë mos gaboj, nja 6 muaj ose 7 muaj. Policia i ka këto imazhe. Personi është me automatik në dorë. Në rrugë, mes qyteti, ja karburanti, e ka qëlluar burrin e huaj. Shikoje ku e ke. Është Me automatik në dorë. Ky njeriu sot është me masë sigurie ndodhet në Dubai. Këto filmime nuk i ka vetëm policia, të jesh i sigurt. Më shumë se policia ata i kanë vetë se i marrin me njëri-tjetrin. Shiko, ngjarjet ne kemi bërë disa emisione për ngjarjet e Rrëshenit, vrasje me snajper. Kjo është një nga vrasjet. Ndërsa Ben Ndoka pret që grupi i Durrësit dhe i Niklës të shkojë të vrasë Durim Bamin, ata i thonë, na kanë ikur me Sonin. Ky është Soni. Po përpiqet të vrasin dhe i vunë minën atje poshtë Preng Gjinit, pasi kishte ndodhur vrasja me snajper. Këto zinxhir vrasjesh pa autorë prodhojnë vetëm vrasje”, tha Hoxha.
