Kreu i Partisë së Lirisë, Ilir Meta ka reaguar në rrjetet sociale në lidhje me dëshminë e dhënë ditën e sotme në Prokurorinë e Posaçme (SPAK), në lidhje me kontratat e konsulencës dhe lobimit në Shtetet e Bashkuara të Amerikës të bëra nga ish-LSI, për të cilat edhe akuzohet.
Meta thekson se ende nuk ka asnjë shkresë për thirrjen e tij në SPAK dhe se për gjithçka është informuar nga media. Ai shton më tej se ka dhënë sqarime të qarta, për të gjitha pyetjet që i janë drejtuar nga hetuesit.
Por sipas Metës, seanca ishte me pyetje reciproke, pasi hetuesit nuk i janë përgjigjur pyetjeve të bëra prej tij dhe avokatit Genc Gjokutaj, duke iu shmangur “për moskompetencë” sipas kreut të Partisë së Lirisë.
“Së pari, çfarë bëhet me hetimin e çështjes McGonigal, kryeagjentit të FBI të dënuar me burg për shkak të korruptimit nga kryekorruptuesi i ndërkombëtarëve, aktualisht Kryeministër?
Së dyti, çfarë bëhet me hetimin për fotografinë e paligjshme me Presidentin Obama të “Gruas së Bilalit” për të cilën një shtetas shqiptaro-amerikan ka bërë burg në Shtetet e Bashkuara të Amerikës?” – shkruan Meta për dy pyetjet që iu ka drejtuar oficerëve të BKH-së që e kanë marrë në pyetje.
Gjithashtu, Meta iu kërkon ndjesë edhe gazetarëve që nuk i është dhënë leja që ka kërkuar, që edhe me pranga dhe i shoqëruar, t’u përgjigjeshe çdo pyetje të mediave.
“Falenderoj mediat që më njoftuan dje se do të thirresha sot në SPAK, pasi ende nuk kam një dokument zyrtar njoftimi për t’u paraqitur. Megjithatë, unë isha sot i gatshëm të shkoja në seancë, që në ora 10:00, siç u bë njoftimi vetëm nga mediat dhe vonesa ndodhi vetëm për shkak të SPAK. U kërkoj ndjesë gazetarëve që nuk m’u dha leja që kërkova, që edhe me pranga dhe i shoqëruar, t’u përgjigjesha çdo pyetje të tyre.
Dua t’ju siguroj se kam dhënë sqarime shumë të qarta, me sjelljen time tepër transparente, për të gjitha pyetjet që m’u drejtuan, duke sqaruar edhe njëherë në respektin tim të plotë ndaj të gjitha ligjeve shqiptare dhe amerikane për çështjen e lobimit. Por më lejoni t’ju sqaroj se ishte një seancë me pyetje reciproke, ne ju përgjigjëm të gjitha pyetjeve të tyre, ata ju shmangën “për moskompetencë” pyetjeve tona.
Pyetja jonë e parë ishte se çfarë bëhet me kallëzimin tonë të dorëzuar më 6 dhjetor në SPAK lidhur me rrëmbimin kriminal dhe banditesk.
Meqënëse ata ishin të interesuar për çështjen e lobimeve, pasi ju përgjigja të gjitha pyetjeve të tyre, si President i Partisë së Lirisë, forcës së dytë opozitare në vend, u bëra unë dy pyetje që kanë të bëjnë me interesin e lartë publik, konkretisht me çështjen e lobimeve të paligjshme.
Së pari, çfarë bëhet me hetimin e çështjes McGonigal, kryeagjentit të FBI të dënuar me burg për shkak të korruptimit nga kryekorruptuesi i ndërkombëtarëve, aktualisht Kryeministër? Së dyti, çfarë bëhet me hetimin për fotografinë e paligjshme me Presidentin Obama të “Gruas së Bilalit” për të cilën një shtetas shqiptaro-amerikan ka bërë burg në Shtetet e Bashkuara të Amerikës?” – shkruan Meta.
Ilir Meta ndodhet në paraburgim që prej 21 Tetorit të vitit të kaular, kur u arrestua dhunshëm nga Policia në mes të ditës, në hyrje të Tiranës, pranë “Casa Italia-s”. Ai ndodhet në paraburgimin e burgut “313” në Tiranë, teksa masa e sigurisë ndaj tij është konfirmuar edhe nga Gjykata e Posaçme e Apelit.
Veç kontratave të konsulencës dhe lobimit në Shtetet e Bashkuara të Amerikës, Ilir Meta akuzohet nga SPAK dhe për çështjes “CEZ-DIA”, pastrimin e produkteve të veprës penale në blerjen e një shtëpie në Tiranë si dhe mosdeklarimin e shpenzimeve mjekësore për periudhën 2013-2019.
Ndaj Ilir Metës rëndojnë akuzat për 3 veprat penale “Korrupsioni pasiv i funksionarëve të lartë shtetërorë ose të zgjedhurve vendorë” në 3 (tre) raste nga të cilat në dy raste është kryer në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Vlen të theksohet fakti se ditën e djeshme u paraqit në SPAK edhe bashkëshortje e Metës, me të cilën është në proces divorci, deputetja Monika Kryemadhi, si dhe mamaja e kësaj të fundit, Fatime Kryemadhi.
