Ministri për Europën dhe Punët e Jashtme, Igli Hasani ka konfirmuar se nuk ka asnjë shqiptar të lënduar gjatë sulmit tragjik në tregun e Krishtlindjeve në Magdeburg të Gjermanisë.
Për ironi të fatit, ministri i jashtëm në mesazhin e tij shfaqet i tronditur nga ky sulm duke shprehur keqardhje për viktimat në Gjermani, ndërsa si të gjithë ministrat e tjerë të Ramës edhe Hasani “kyçi” gojën për vrasjen e Martin Cani në derën e shkollës ‘Fan Noli’ në mes të kryeqytetit.
Asnjë keqardhje nuk shprehu për vrasjen e 14-vjeçarit që tronditi opinionin publik që për disa ditë me radhë vijuan protestat duke kërkuar dorëheqen e ministres së arsimit pasi dështoi i gjithë “zinxhiri arsimor” nga hallka e parë deri tek e fundit.
“Thellësisht të tronditur nga lajmi për sulmin mizor në Magdeburg, i cili ka lënë dhjetëra familje të shkatërruara gjatë një periudhe që duhej të ishte e gëzueshme. Zemrat tona janë pranë viktimave, familjeve të tyre dhe popullit gjerman gjatë kësaj kohe të vështirë”, shkruan ministri Hasani.
Ngjarja e rëndë ka ndodhur në një treg Krishtlindjesh në qytetin e Gjermanisë, Magdeburg ku një makinë ka marrë para një turmë njerëzish duke lënë disa të vdekur dhe dhjetra të plagosur.
