Matjet e ndryshimit vjetor të çmimeve në muajin nëntor sipas një metodologjie të Eurostat treguan rritje më të madhe të inflacionit se matjet kombëtare nga INSTAT.
Ndryshimi vjetor i matur nga Indeksi i Harmonizuar i Çmimeve të Konsumit në muajin nëntor 2024 është 2,4%, ndërsa sipas matjeve të INSTAT ishte 2%.
Sipas metodës së Eurostat, rritja më e madhe e çmimeve prej 4,1% vërehet në grupin “Pije alkoolike dhe duhan”, pasuar nga grupet “Argëtim dhe kulturë” me 3,9%, “Mobilim, pajisje shtëpie dhe mirëmbajtje” me 3,5%, “Veshje dhe këpucë” me 3,4%, “Ushqime dhe pije joalkoolike” me 3,2%, “Hotele, kafene dhe restorante” me 3,0%, “Mallra dhe shërbime të ndryshme” me 2,1%, “Shërbimi arsimor” me 1,6%, “Shëndeti” me 1,5%, “Qira, ujë, lëndë djegëse dhe energji” me 1,1%, “Komunikimi” me 0,8%.
Nga ana tjetër, çmimet e grupit “Transporti” u ulën me 3,0%. Në muajin nëntor 2024, ndryshimi mujor i matur nga indeksi i Harmonizuar i Çmimeve të Konsumit është -0,3%. Ky ndryshim është ndikuar kryesisht nga ulja e çmimeve të grupit “Ushqime dhe pije joalkoolike” me 1,1%, pasuar nga grupet “Argëtim dhe kulturë” me 0,5%, “Shëndeti” me 0,2%, “Transporti” me 0,1%.
Nga ana tjetër, çmimet e grupit “Hotele, kafene dhe restorante” u rritën me 0,7%, pasuar nga grupet “Shërbimi arsimor” me 0,4%, “Veshje dhe këpucë” me 0,3%, “Pije alkoolike dhe duhan” dhe “Mallra dhe shërbime të ndryshme” me 0,2% secili, “Mobilim, pajisje shtëpie dhe mirëmbajtje” dhe “Qira, ujë, lëndë djegëse dhe energji” me 0,1% secili.
Sipas Eurostat inflacioni në Shqipëri në muajin nëntor ishte gati i njëjtë me atë të BE, 2,5%.
Indeksi i Harmonizuar i Çmimeve të Konsumit (IHÇK) mat ndryshimin e nivelit të çmimeve me pakicë të mallrave dhe shërbimeve nga pikëpamja e strukturës së shpenzimeve të cilat konsumatori (vendas dhe i huaj) synojnë për konsumin final në territorin e Shqipërisë.
IHÇK përdoret për monitorimin e lëvizjes së çmimeve me pakicë në vendet Evropiane, duke krahasuar përqindjen e inflacionit ndërmjet vendeve të Evropës dhe si inflacion zyrtar i Bankës Qendrore Evropiane duke siguruar stabilitetin e çmimeve në Bashkimin Ekonomik dhe Monetar.
Shqipëria nisi publikimin e IHÇK-së nga muaji Janar 2017, INSTAT. indeksi llogaritet dhe publikohet sipas strukturës së Klasifikimit Evropian të Shpenzimeve individuale me 12 ndarje kryesore
Periudha referuese e çmimeve është muaji Dhjetor 2020, ndërsa periudha referuese e indeksit është muaji Dhjetor 2020 Peshat për IHÇK janë llogaritur në përputhje me Rregulloren e Komisionit Europian. Peshat reflektojnë strukturën e shpenzimeve monetare të konsumit final të familjeve shqiptare dhe jo shqiptare në territorin e Shqipërisë./ Monitor.al
