Pas sulmit më 29 nëntor të këtij viti në kanalin e Ibër-Lepencit në Kosovë, Kryeministri Albin Kurti thotë se mund të fshihen grupe ekstremiste dhe terroriste serbo-ruse. Kurti i referohet një sërë emblemave të gjetura së bashku me municione nga aksioni i policisë të Kosovës, pas shpërthimit në kanalin e ujit. Emblemat janë si të ushtrisë ruse dhe serbe, por edhe të grupeve paramilitare.
Kreu i qeverisë së Kosovës jep alarmin dhe se ndaj këtyre aksioneve terroriste që rrezikojnë të gjithë sigurinë në rajon, duhet një reagim vendimtar dhe i unifikuar.
“Pas bastisjeve në veri të Kosovës, në lidhje me sulmin kinetik terrorist të datës 29 nëntor 2024 ndaj kanalit të Ibër Lepencit, janë konfiskuar armë, uniforma dhe pajisje të ndryshme, si dhe janë gjetur emblema ruse dhe serbe të strukturave të inteligjencës, ushtrisë dhe sigurisë.
Ky zbulim shqetësues dëshmon për përfshirjen potenciale të grupeve ekstremiste dhe terroriste serbo-ruse, me lidhje të forta në Serbi, që kanë për qëllim destabilizimin e Kosovës dhe krijimin e një mjedisi të pasigurt në rajon.
Stabiliteti dhe paqja në Ballkan kërkojnë një reagim të unifikuar dhe vendimtar kundër këtyre aksioneve terroriste dhe aktiviteteve destabilizuese që rrezikojnë sigurinë e përgjithshme dhe vlerat demokratike në rajon”, shkruan Kurti.
Sulmin e pak ditëve më parë, Kosova ia adreson Serbisë. Ndërsa kjo e fundit, mohon se qëndron pas asaj ngjarje të rëndë duke u shprehur më herët se ka nisur hetimet e veta për këtë rast. Kanali Ibër-Lepenc furnizon me ujë nga Liqeni i Ujmanit gjithë veriun e Kosovës, rajonet e Mitrovicës, Prishtinën me rrethinë, si dhe Korporatën Energjetike të Kosovës për ftohjen e termoelektranave të saj.
