Gazetari Igli Çelmeta ishte i ftuar në Euronews Albania, ku foli mbi vrasjen e së dielës te një lokal në Ndroq ku 50-vjeçari Alfred Dedja dyshohet se u vra nga Julian Gjoshi, kunati i Altin Hajrit.
Gazetari Çelmeta solli një detaj të ri dhe të trishtë ku tregoi se viktima e njihte Julian Gjoshin që kur ky i fundit kishte qenë fëmijë dhe pothuajse e kishte rritur pasi Alfred Dedja kishte punuar (i paregjistruar) në biznesin e familjes Hajri. Çelmeta tha se nuk duket si një atentat, por më shumë ka tiparet e një sherri banal por që nuk kuptohet pse ka ardhur.
Ai tregoi si viktima dhe autori i dyshuar njiheshin prej shumë vitesh dhe tha se pas dorëzimit në polici Gjoshi ka shfaqur shenja të çregullimit mendor dhe nuk kuptohet nëse janë vërtetë të tilla apo po përdoren për tu kamufluar që ti shpëtojë drejtësisë.
“Nuk kemi të bëjmë me një atentat të organizuar ose mirë menduar, por kemi të bëjmë një ngjarje për motive banale. Si autori dhe viktima njiheshin prej vitesh me njëri-tjetrin. Viktima 50-vjeçari Alfred Dedja i cili është banor i zonës së Ndroqit kishte precedent penal për çështje drogë në Itali ndërsa 10 vite më parë ka punuar të kompleksi Golden i fisit Hajit por jo i regjistruar në tatime si punëtor. Aty ai punonte te aktiviteti i lojrave të fatit të cilat atëherë kanë qene të ligjshme dhe personi në fjalë e ka njohur autorin që kur ka qenë i vogël dhe e ka rritur.
Kanë qenë shumë të njohur pasi Julian Gjoshi është vëllai i gruas së Altin Hajrit. Autori dhe viktima takoheshin shpesh edhe kohë më parë në këtë lokal ku ndodhi vrasja. Ditën e ngjarjes autori është futur në lokal dhe është ulur në një tavolinë tjetër dhe me pas ka shkëmbyer një debat me Alfred Dedjan dhe kur Dedja i është afruar Gjoshi e ka qëlluar me 5 plumba 3 prej të cilëve e kanë kapur të ndjerin ndërsa në lokal ka shpërthyer paniku te klientët.
Kur është vetëdorëzuar këtë të hënë ka shfaqur çrregullime, ka qenë i paqartë, nuk ka dashur te flasë për rrethanat dhe motivet e ngjarjes por kanë qenë familjarët e autorit të dyshuar të cilët kanë thënë që djali pasi ishte rikthyer kohët e fundit nga Spanja ka shfaqur çrregullime të shëndetit mendor dhe pritet që prokuroria të kërkojë ekspertim mjeko-ligjor për të kuptuar nësë vërtetë i ka këto probleme apo kjo po tentohet të përdoret si kamuflin për ti shpëtuar drejtësisë” – tha gazetari Igli Çelmeta.
Ndërsa gazetari Eni Ferhati ka thënë se autori mund ti ketë shfaqur këto çrregullime dhe në momentin e vrasjes mbase dhe për shkak të përdorimit të lëndëve narkotike por gjithsesi hetimet e mëtëjshme dhe dëshmitë do ta zbulojnë dhe tregojnë realisht se çfarë ka ndodhur dhe nëse Gjoshi do të pranojë ose jo autorsinë dhe që të tregojë arsyet që e kanë shtyrë për të vrarë 50 vjeçarin Alfred Dedja.
