Gjykata e Posaçme kundër Korrupsionit dhe Krimit të Organizuar ka dënuar në mungesë me burgim të përjetshëm Altin Hajrin, i shpallur fajtor për rrëmbimin me pasojë vdekjen e Jan Prengës, ngjarje e ndodhur në janar të vitit 2020 në Kamzë.
Sipas vendimit të trupit gjykues, provat e administruara gjatë procesit kanë qenë të mjaftueshme për të provuar përfshirjen e Hajrit në këtë krim të rëndë.
Megjithatë, i pandehuri ka mohuar akuzat përmes mbrojtjes së tij ligjore, duke deklaruar se nuk ka pasur dijeni për planin e rrëmbimit.
Më herët, për të njëjtën ngjarje, Gjykata ka dënuar gjithashtu me burgim të përjetshëm edhe Festim Bexhdilin, i cili është shpallur fajtor për rolin e tij në këtë çështje.
Ngjarja
Jani Prenga u rrëmbye mesditën e 17 janarit të 5 vjetëve më parë, nga 4 persona në mes të Kamzës, u dërguar në një prej resorteve më të njohura në vend dhe më pas trupi i tij u zhduk.
Në fakt, ishin ca pamje që u nxorën në media ku u mësua se i rrëmbyeri kishte mbërritur i pajetë në resortin e Altin Hajrit në Shijak, por policia, prokuroria dhe asnjë instancë që merret me hetimin e akteve të tilla nuk gjurmuan dot asnjë të dhënë që u mor vesh shpejt nga denoncimi i familjes Prenga.
Dritan Rexhepi është akuzuar si organizatori i atij akti brutal, ndërsa rrëmbimin dyshohet se e kanë kryer 4 persona nga Shkodra.
Pikërisht për shkak të kësaj akuzë, vlonjati Rexhepi ishte në gjykatë më 23 Prill ku mohoi përfshirjen në rrëmbimin e Prengës, njohjet me personazhet e krimit, si edhe përfshirjen në atë histori të vjedhjes së drogës në Angli, apo të njihte Altin Hajrin të zotin e resortit nga ku u zhduk trupi i Prengës.
Po ashtu ai kërkoi ballafaqim më të vëllanë e të zhdukurit, kërkoi të sillen komunikimet e SKY ECC në Gjykatë, kërkoi të mos i bëhej moral në sallën e gjyqit, e po ashtu të mos e përfshinin në atë akt, pasi ai në atë kohë gjendej në burg në Guayaquil-i në Ekuador, i dënuar për trafik ndërkombëtar kokaine.
Por, që në krye të herës, u tha se një person me emrin Gramoz nga Vlora, kishte organizuar të gjithë ngjarjen, por Gramozi në GJKKO mohoi dje të ishte ai Gramozi nga Vlora për të cilin flet dosja.
Rexhepi deklaroi se lidhur me këtë ngjarje nuk ka pasur asnjë komunikim në aplikacionin SkyECC, i përdorur gjerësisht nga rrjetet kriminale, ndërsa i pyetur nga prokurorët e SPAK nëse ka njohje me Altin Hajrin, ‘mbreti i kokainës’ tha se nuk i thotë asgjë ky emër.
