30-vjeçari Adnan Ramadani dhe 49-vjeçari Imer Imeri janë dy shqiptarët nga Maqedonia e Veriut, të cilët akuzohen për vrasjen e 41-vjeçarit shqiptar, Van Koxha, i cili u ekzekutua me thikë mbrëmjen e 25 nëntorit në Marghera (komunë e Venecia) të Italisë, në afërsi të stacionit të Mestres.
Në momentin e krimit, ai ndodhej bashkë me të vëllain, i cili po ashtu u plagos dhe është dërguar në spital, por nuk është në rrezik për jetën, teksa vrasja dyshohet se ka ndodhur për larje hesapesh.
Media italiane “Il Gazzettino” ka zbardhur detaje të reja, e cila raporton se Imeri akuzohet për sherr në ambiente publike dhe rrezikon burgim nga dy deri në gjashtë vjet, ndërsa për Ramadanin akuza do të jetë më e ashpër pasi u kap me thikë në dorë.
Mbetet që të verifikohet nëse ajo thikë është përdorur për dy goditjet vdekjeprurëse në gjoksin e 41-vjeçarit shqiptar dhe për plagosjen e vëllait të tij. Deri më tani, në thikë nuk janë gjetur gjurmë gjaku, por hetimet vijojnë.
Deklaratat
Gjatë marrjes në pyetje Ramadani ka shfrytëzuar të drejtën që të mos përgjigjet, ndërsa Imeri pretendon se nuk ka parë asgjë dhe as ka marrë pjesë në përleshje.
Ai i tha gjyqtarit se në momentin që ka ndodhur ngjarja ishte ulur në një lokal aty pranë, por nuk kishte marrë pjesë në përplasje sepse sapo kishte bërë një operacion pasi kishte probleme me shpinën dhe këmbën.
Mbrojtësi i tij shtoi gjithashtu se klienti i tij çalon, ndaj dhe nuk ka shanse të kishte marrë pjesë në përplasje pasi do të rrezikonte jetën e tij. Por edhe kjo mbrojtje nuk e ka liruar nga burgu.
Hetimet
Tani hetimet vazhdojnë për të rindërtuar atë që ndodhi në via Rizzardi. Fillimisht u fol për një përplasje mes 4 maqedonasve dhe 4 shqiptarëve, të cilët e kishin lënë që të takoheshin në vendin që ndodhi sherri.
Në kërkim janë të paktën, dy maqedonas dhe dy shqiptarë të cilët ende nuk janë gjetur. Me hetimet në numrat e telefonit të personave të arrestuar, mund të bëhet i mundur gjurmimi i disa prej tyre.
