Një shpërthim ndodhi mbrëmjen e djeshme në fshatin Varagë të komunës së Zubin Potokut në veri të Kosovës i cili shkaktoi ndërprerje të furnizimit me ujë për disa qytete dhe po ashtu për Korporatën Energjetike të Kosovës.
Bandat kriminale me mbështetje të Beogradit zyrtar dyshohet se janë prapa këtij shpërthimi.
Duhej të ndodhte një sulm në infrastrukturën kritike të Kosovës, që Rama të zgjohej nga gjumi dhe të kuptonte se Kosova është nën sanksione të padrejta nga BE, ku një ndër kontribuesit për t’u sanksionuar është edhe vetë ai me deklaratat e famshme ndaj BE-së që ta trajtojë në mënyrë të barabartë mizorin dhe viktimën.
Në një postim në rrjetin social X ai shprehet se Bashkimi Europian duhet të heqë menjëherë sanksionet e mbetura ndaj Kosovës dhe të riangazhohet në një format të ri dialogu për normalizim mes Kosovës dhe Serbisë. Ai shkruan se formati ekzistues i dialogut ka dështuar të prodhojë rezultatet e dëshiruara mes dy vendeve.
“Akti i sabotazhit mbi infrastrukturën kritike të furnizimit me ujë në kanalin e Ibër Lepencit është një krim i rëndë, i cili cënon jetën e qytetarëve të Kosovës dhe godet procesin e normalizimit të marrëdhënieve në rajonin tonë, ku të gjitha shtetet janë të përfshira në rrugën e integrimit në Bashkimin Europian. Kjo goditje kriminale duhet zbardhur e ndëshkuar sa më parë me mbështetjen e partnerëve ndërkombëtarë.
Ndërkohë Bashkimi Europian duhet të heqë menjëherë sanksionet e mbetura ndaj Kosovës dhe të riangazhohet në një format të ri dialogu për normalizim mes Kosovës dhe Serbisë. Formati ekzistues ka dështuar të prodhojë rezultatet e dëshiruara dhe është koha që çështjet e dialogut të kalojnë përmes marrëdhënieve bilaterale të BE-së me Kosovën apo Serbinë, si dy shtete njësoj të pavarura prej njëra-tjetrës, ku fati europian i secilit shtet s’mund të varet nga dëshirat a mosdëshirat e shtetit tjetër; ashtu sikundër fati europian i krejt rajonit s’mund të varet nga mosnjohja e Kosovës nga Serbia apo 5 shtete anëtare të BE-së.“- shkruan Rama.
