Kokaina e cila përpunohej në kryeqytet dhe zona të tjera si Durrës dhe Qerekë të Niklës dyshohet se vinte nga Amerika Latine.
8 persona kanë rënë në pranga gjatë operacionit antidrogë në Tiranë, Qerekë dhe disa zona të tjera, ndërsa aksioni vijon ende.
Burime për mediat bëjnë me dije se është konfirmuar se një banesë në Qerekë ishte përshtatur si vend që do përpunohej lënda narkotike kokainë, ku janë gjetur pajisje materiale që përpunojnë drogën. Ndërkohë, ende nuk dihet asnjë e dhënë për këtë operacion se sa është sasia e drogës së kapur kokainë dhe identiteti i personave të arrestuar.
Operacioni vijon edhe në qytete të tjera, në Durrës, Kavajë, Nikël dhe perfieri të Tiranës, për shkak se grupi përdorte zona të ndryshme dhe objekte të ndryshme duke e zhvendosur vendin ku përpunohej kokaina. Burime jo zyrtare thanë se kokaina sillej nga vendet e Amerikës Latine, një linjë e njohur për grupe të tjera kriminale.
Sipas Tch, njëri prej anëtarëve të grupit kriminal është Aldi Zonja. Ka përgjime dhe vëzhgime ambientale për zbardhjen e këtij aktiviteti kriminal, teksa deri më tani autoritetet ia kanë dalë mbanë ta ruajnë sekretin hetimor dhe do të ketë një njoftim zyrtar në vijim.
Operacioni po kryhet nga Prokuroria e Posaçme (SPAK) në bashkëpunim me Forcat Operacionale dhe agjentët spanjollë, pasi autoritetet e Spanjës ishin ato të cilat dhanë sinjalet e para për këtë grup kriminal.
