Grupi Parlamentar i Partisë Demokratike ka nisur që sot vizitën në Parlamentin Europian, ku ditën e nesërme kanë paralajmëruar mbajtjen e një proteste para godinës së këtij institucioni.
Deputetët demokratë Gazment Bardhi, Flamur Noka, Jorida Tabaku, Agron Gjekmarkaj dhe Albana Vokshi janë takuar ditën e sotme me eurodeputetët Sandro Gozi, sekretar i Përgjithshëm i PPE-së, dhe dhe Oihane Agirregoitia Martinez, përfaqësuesë e grupit parlamentar “Renew Europe”.
Përmes një postimi në rrjetet sociale, Bardhi bën me dije se i kanë informuar dy eurodeputetët në lidhje me situatën në Shqipëri, ku sipas tij, pushteti i kriminalizuar i Edi Ramës synon asgjesimin e opozitës përmes burgosjeve politike të lidershipit të opozitës
Reagimi i plotë i Bardhit:
Nisëm sot takimet në Parlamentin Europian me z. Sandro GOZI, eurodeputet dhe Sekretar i Përgjithshëm i Partisë Demokratike Europiane, dhe znj. Oihane Agirregoitia Martínez, përfaqësuesë të grupit parlamentar “Renew Europe”.
Informimi i plotë mbi situatën në Shqipëri ishte në fokus të bisedës, me dy mbështetës të të ardhmes europiane të Shqipërisë. Është e paimagjinueshme për çdo mik europian të Shqipërisë, që të perceptojnë se vendi ynë, edhe pse vend kandidat për në BE, ka ekzekutuar shtetin ligjor, ka asgjesuar balancën mes pushteteve, dhe ka eleminuar zgjedhjet e lira.
Shqipëria është i vetmi vend në Europë që ndërkohë që qeveriset me prova të pakontestueshme nga krimi i organizuar, deri në pikën që organizatat kriminale diktojnë edhe vendet e kandidatëve për deputet në listën e PS, pushteti i kriminalizuar i Edi Ramës synon asgjesimin e opozitës përmes burgosjeve politike të lidershipit të opozitës, duke na rikthyer 34 e më shumë vjet pas dhe duke vënë në pikëpyetje serioze demokracinë.
