I ftuar në SYRI TV, gazetari Baton Haxhiu ka folur për arrestimin e dhunshëm dhe të paprecedent gjatë ditës së sotme të Presidentit të PL-së, Ilir Meta.
Sipas Haxhiut, drejtësia selektive është më keq se padrejtësia, pasi edhe nqs SPAK ka dokumentacion për këto krime që përmenden por nuk mundet drejtësia selektive të dënojë vetëm opozitën, dy drejtues të opozitës ose dy liderët e opozitës në një moment para zgjedhjeve.
‘Kjo drejtësi selektive është problematike. Si qytetar i këtij vendi po më vjen turp që ky banditizëm i policisë është i pajustifikueshëm’, u shpreh Haxhiu.
Haxhiu: Çfarë të them. Realisht kur e sheh një pamje të tillë është për të ardhur keq. Mundohesh të justifikosh se nuk e kemi një polici të tillë që është e vrazhdë pa shije dhe jo profesionale. Nuk ka shije profesionale. Nuk kanë shije janë shumë keq. Është për të ardhur keq. Përgjegjësia e parë është për personin e parë të policisë që ka dërguar një ekip të tillë për të vrazhdësuar një ndalje ose arrestim. Kjo është sa i përket pamjeve.
Kam një problem se drejtësia selektive është më keq se padrejtësia. SPAK ka dokumentacion për këto krime që përmenden por nuk mundet drejtësia selektive të dënojë vetëm opozitën, dy drejtues të opozitës ose dy liderët e opozitës në një moment para zgjedhjeve për arsye se është problematike pastaj dhe kjo drejtësi selektive, realisht pa marrë parasysh se mund të jetë në bindjen e SPAK se dëshirojmë ta lirojmë nga vjetërsia politikën, nuk kanë të drejtë që ta bëjnë këtë sepse kjo drejtësi selektive realisht e lë një autokraci politike.
Sot nga ajo që lexova, e shkruar jo profesionalisht, një arsyetim banal dhe të lë shijen e hakmarrjes më shumë se të arrestimit të një personi edhe për faktin se personi ka qënë ish-president ish-kryeministër ish-ministër i Jashtëm dhe ish-kryetar Kuvendi.
Edhe po ta refuzonte, policia ka mekanizma që ta përcjellë ta ndalojë dhe ta gjejë një vend dhe jo vend publik pasi më pas është poshtërim dhe jo arrestim, sepse nuk kemi të bëjmë me një kriminel që ka revole, nuk kemi të bëjmë me një bandë që refuzon, por kemi të bëjmë me një njeri që ka në politikë 30 vjet.
Kjo drejtësi selektive është problematike. Si qytetar i këtij vendi po më vjen turp që ky banditizëm i policisë është i pajustifikueshëm.
