Kryetari i Partisë Demokratike, Sali Berisha e ka quajtur arrestimin e dhunshëm dhe të paprecedent të kreut të PL-së, Ilir Meta, një akt burracak të kryeministrit Edi Rama.
“Arrestimi i Metës, akt burracak i Ramës, dëshmoi se në shpirtin e tij nuk ka asnjë dallim nga i ati xhelat që vari Havzi Nelën”- tha Berisha gjatë mbledhjes së Kryesisë së PD-së.
Berisha u shpreh se Rama i ka shpallur luftë opozitës dhe reagimi do të jetë i menjëhershëm me çdo çmim.
“Rama na shpalli luftë dhe ne do i përgjigjemi, kjo betejë kërkon udhëheqje nga ana juaj të demokratëve dhe mbështetësve tanë në një mosbindje civile për të shpëtuar këtë vend. Para syve tanë, para kamerave, publikut shqiptar dhe botës, ndodhin akte të cilat edhe në diktaturë nuk ishin kaq publike, qëllimi i tyre është të frikësojnë qytetarët. Ne duhet të dalim vet në krye, të paguajmë çdo çmim, jemi të gatshëm për çdo çmim, Ti japim përgjigjen e merituar këtij regjimi.
Të ngrihemi me të gjitha mjetet e mosbindjes civile, prova ishte e shkëlqyer. Fati i Shqipërisë varet nga vazhdimi i saj. Opozita duhet të bëjë atë që se ka bërë gjer sot, të udhëheqë me guxim e vendosmëri qytetarët në këtë përballje me pushtetarët dhe bandat”, tha Berisha.
Berisha zbuloi se drejtuesit në qarqe të PD-së do të organizojnë paralizimin e plotë të këtij regjimi më datë 29 tetor si dhe paralajmëroi se pas kësaj proteste do të ketë edhe një tjetër.
“Më datë 29 drejtuesit në qarqe do të organizojnë paralizën e plotë të këtij regjimi. Pas datës 29, data tjetër do të jetë shumë e afërt”, tha Berisha.
