Nga Boldnews.al
Prokuroria e Posaçme urdhëroi arrestimin e deputetit të sapodorëhequr socialist, Jurgis Çyrbja, në një veprim që duket sërish se ka qenë i koordinuar me kryeministrin, Edi Rama.
Ligjvënësi i zgjedhur nga lista e Qarkut të Durrësit u arrestua vetëm pak ditë pasi ai dorëzoi mandatin e deputetit “për arsye shëndetësore”. Prokuroria e Posaçme e ka pasur nën hetim Çyrbjan më së paku prej vitit 2023.
Por, veprimet e prokurorëve të posaçëm morën një nxitim galopant sapo ai dha dorëheqjen nga mandati i deputetit.
Të dhënat zyrtare, të publikuara deri më tani nga Prokuroria e Posaçme, tregojnë për një hetim sipërfaqësor dhe me shumë pikëpyetje.
“Boldnews.al” ka evidentuar disa element në qëndrimin zyrtar të SPAK-ut, mbi të cilat ngrihen dyshime se arrestimi “nxitimthi” i Jurgis Çyrbjas po tenton të fsheh skandale më të mëdha që gjenden në atë dosje hetimore.
Pse “nxitimthi
”Në njoftimin zyrtar të SPAK-ut, thuhet se ka nisur një hetimi në vitin 2023, pa specifikuar veprat penale dhe pa thënë nëse ka pasur persona të dyshuar.
Në vijim thuhet se “Prokuroria e Posaçme, mbi bazën e referimit të bërë më datë 15.10.2024 nga Hetuesit e Byrosë Kombëtare të Hetimit, ka proceduar me ndarjen e akteve të procedimit penal Nr. 93 të vitit 2023 dhe regjistrimin e procedimit penal Nr. 93/1 të vitit 2024”.
Pra, hetimi, mbi të cilin u arrestua së fundmi (20 tetor 2024) Jurgis Çyrbja, ka nisur vetëm pak ditë para arrestimit të tij, konkretisht në 15 Tetor 2024.
Brenda 5 ditëve, SPAK-u ka verifikuar të dhëna, ka konsultuar dokumenta, si dhe ka arritur të krijojë bindjen se Jurgis Çyrbja është autor i dyshuar i veprave penale të “korrupsionit aktiv në zgjedhje”, “zbulim i akteve sekret shtetëror”, “tregtimi i sekretit shtetëror” dhe “përkrahje e autorit të krimit”.
Ky rast mund të merrej si shembull për efikasitet ekstrem të SPAK-ut. Por, veprimet e Prokurorisë së Posaçme duhen parë nën dritën e zhvillimeve të tjera politike të Çyrbjas.
Jurgis Çyrbja u thirr në SPAK në 8 Tetor 2024. Dy ditë më pas, në 10 Tetor, ai dha dorëheqjen nga mandati i deputetit, duke e justifikuar me “arsye shëndetësore”.
Vetëm pesë ditë më pas, pra në 15 Tetor 2024, Byroja Kombëtare e Hetimit dërgon në Prokurorinë e Posaçme materilet për Jurgis Çyrbjan, i cili tashmë nuk gëzonte më mandatin e deputetit. Dhe, pasi kaluan edhe 5 ditë të tjera, SPAK-u dërgoi në derën e Çyrbjas urdhër-arrestin.
Kush janë “bashkëpunëtorët” zyrtarë të Çyrbjas
Falë këtij “hetimi 5-ditor”, SPAK-u thotë që nuk ka arritur ende të zbulojë bashkëpunëtorët me poste zyrtare të Jurgis Çyrbjas për realizimin e veprës penale të “zbulimit të akteve sekret shtetëror”.
Në njoftimin zyrtar të Prokurorisë së Posaçme, thuhet: “Nga analiza e akteve të administruara deri në këto momente, ekzistojnë dyshime të arsyeshme të bazuara në prova se, funksionarë publik (të paidentifikuar deri në këtë fazë të hetimit), në kundërshtim me përmbushjen e rregullt të detyrës në 7(shtatë) raste, kanë zbuluar akte të cilat ligji i përcakton si sekret shtetëror, pasi me përmbajtjen e tyre rezulton se është vënë në dijeni personi nën hetim Jurgis Çyrbja”.
Pikëpyetja thelbësore në këtë rast është se për çfarë arsye SPAK-u nuk është treguar pak më “i qetë” dhe të identifikonte “funksionarët publikë” që kanë bashkëpunuar me Jurgis Çyrbjan.
Kush i tregoi për operacionet policore
Prokuroria e Posaçme ka krijuar dyshime të arsyeshme se ish-deputeti Jurgis Çyrbja ka konsumuar elementët e veprës penale të “Tregtimit të sekretit shtetëror”.
Zyrtarisht, SPAK-u thotë se: “…Personi nën hetim Jurgis Çyrbja është vënë në dijeni edhe të disa planeve operacionale të Policisë së Shtetit, lidhur me kontrollet që do zhvilloheshin në zonën e Durrësit, me qëllim për të kapur personat e shpallur në kërkim dhe ky informacion rreth përmbajtjes së dokumenteve dhe akteve që sipas ligjit përbëjnë sekret shtetëror u është transmetuar personave të shpallur në kërkim, si drejtëpërdrejtë prej tij, ashtu edhe përmes angazhimit të personit tjetër nën hetim Ahmet Masha”.
Hetimi “5-ditor” i SPAK-ut nuk ka zbuluar, megjithëse teorikisht ekzistonin të gjitha mundësitë”, personat/zyrtarët policorë, të cilët e kanë furnizuar me informacion Çyrbjan dhe ky i fundit ka njoftuar personat në kërkim.
