Yllli i Real Madridid dhe i Francës, Kylian Mbappe akuzohet për përdhunimin e një suedezeje gjatë një vizite në Stokholm. Ngjarja dyshohet se ka ndodhur më 10 tetor.
Një prokuror suedez tha sot se një hetim për përdhunim ishte hapur pa përmendur Kylian Mbappe, pas raportimeve të mediave se Mbappe ishte i dyshuari për këtë akt pas një vizite në Suedi.
Gazetat suedeze Aftonbladet dhe Expressen si edhe transmetuesi publik SVT të martën raportuan se 25-vjeçari Mbappe ishte objektivi i hetimit, pas vizitës së tij dy-ditore në kryeqytetin nordik javën e kaluar.
“Në përgjigje të raporteve të mediave për një përdhunim të dyshuar në Stockholm, prokurori mund të konfirmojë se një kallëzim penal është dorëzuar në polici”, tha në një deklaratë Autoriteti i Prokurorisë suedeze.
Ai shtoi se incidenti i supozuar ndodhi në një hotel më 10 tetor, por nuk përmendi një të dyshuar dhe tha se nuk mund të ndahen informacione të mëtejshme për momentin.
Expressen të hënën identifikoi Mbappen si të dyshuar, duke cituar burime anonime, ndërsa Aftonbladet dhe SVT thanë të martën se kishin marrë gjithashtu informacione që konfirmonin se Mbappe ishte i dyshuari. Expressen tha se Mbappe ishte “i dyshuar në mënyrë të arsyeshme” për përdhunim dhe sulm seksual, niveli më i ulët i dy dyshimeve në sistemin ligjor suedez.
Sipas Autoritetit të Prokurorisë, shkalla më e lartë e dyshimit, “shkaku i mundshëm”, është zakonisht një parakusht që një i dyshuar të mbahet në paraburgim përpara një akuze formale.
I kontaktuar nga AFP të hënën, stafi dhe menaxherët e Mbappe thanë se nuk kishte njohuri për një ankesë ligjore të bërë kundër tij.
Francezi nuk u përzgjodh për raundin e fundit të ndeshjeve të Ligës së Kombeve, kështu që vizitoi kryeqytetin suedez me një grup shokësh të enjten e kaluar.
Sipas Aftonbladet, ata darkuan në një restorant para se të shkonin në një klub nate dhe u larguan nga Suedia të premten. Aftonbladet tha se ankesa ishte paraqitur të shtunën pasi viktima e supozuar kishte kërkuar kujdes mjekësor.
Tani pritet të shohim se çfarë do të ndodhë në vijim.
