Elbasani luan këtë të diel një sfidë delikate me kryesuesit e Vllaznisë. Verdheblutë do të kenë shansin që në rast fitoreje të ngjiten në krye. Për shumë faktorë, ndeshja me shkodranët është e një rëndësie të veçantë.
Edhe pse në kalendar është një ndeshje transferte, ajo me Vllazninë do të luhet në stadiumin “Elbasan Arena”. Dhe ky është si një asist, për vetë faktin se në fushën e tij Elbasani ka treguar se e ka më të lehtë për të marrë maksimumin.
Jo vetëm kaq, por të besuarit e trajnerit Roberto Bordin edhe në vijim i kanë ndeshjet në fushën e tyre. Pas shkodranëve do të presin Partizanin, një tjetër rival direkt sa i përket luftës për titullin kampion.
Me mbylljen e fazës së parë, verdheblutë kanë një tjetër ndeshje në shtëpi, ku mysafir do të jetë Skënderbeu. Pra, janë tre ndeshje radhazi shumë të rëndësishme në Elbasan, që do të vlejnë jo pak për ecurinë e skuadrës këtë kampionat.
