Agjencia Shtetërore e Kadastrës ka shkarkuar zyrtarët e Kadastrës së Lezhës, pas publikimit të skandalit mbrëmjen e djeshme në emisionin “Fiks Fare”, ku u denoncua se ata ishin nën urdhërat e familjarëve të të ndjerit Ardjan Nikulaj, i vrarë në biznesin e tij në Shëngjin.
Më konkretisht në emision u ankuan qytetarët Arben Staka dhe Luigj Leka, të cilin kishin blerë një pronë, por në Kadastër u kishin dalë problematika dhe kishin bërë kallëzim në Policinë e Lezhës.
Dy orë pas kallëzimit, Arben Staka, u telefonua nga e veja e Ardian Nikulajt, Vera Nikulaj, për ta takuar në lokalin e saj në Shëngjin. Në këto ambiente Arbeni takon drejtorin e Kadastrës, Aris Mema dhe ish-drejtorin Gentian Malotaj dhe i kërkohet që të tërheqë kallëzimin, pasi në të kundër do të kishte “punë” me fëmijët dhe familjarët e të ndjerit Ardian Nikulaj.
Madje sipas denoncuesit, Vera Nikulaj i ka ofruar 100 mijë euro si garanci që do të merrej ajo me rregullimin e problemit, vetëm që të tërhiqte kallëzimin.
Reagimi i ASHK-së:
Agjencia Shtetërore e Kadastrës dënon me forcë rastin e denoncuar nga emisioni “Fiks Fare” mbrëmjen e së martës.
Institucioni ynë distancohet plotësisht nga veprimet e nëpunësve të përfshirë të cilët janë shkarkuar menjëherë nga detyra.
Inkurajojmë organet ligjzbatuese të ndërmarrin masat e nevojshme dhe të ndjekin me përpikmëri procedurat ligjore për të zbardhur plotësisht çështjen, duke sjellë para drejtësisë çdo person të përfshirë në këtë veprimtari të paligjshme.
ASHK mbetet e angazhuar në luftën kundër korrupsionit dhe abuzimeve, duke siguruar transparencë dhe integritet në shërbimet tona për qytetarët.
