Te Vllaznia ‘vlon’ një çështje mes klubit dhe tifozave për mbylljen e sektorit ‘ultras’, C5 në stadiumin ‘Loro Boriçi’ në ndeshjen kundër Bylisit.
Tifogrupi kuqeblu ka bërë disa reagime kundër drejtuesve për këtë vendim, teksa presidenti i klubit, Alban Xhaferi, përmes një postimi në rrjetet sociale shkroi shkurtimisht:
“Eshtë shumë më fisnike t’i shmangesh situatat e pakëndshme përmes heshtjes, sesa t’i tejkalosh ato përmes grindjes”.
Kaq ka mjaftuar që shumë personalite të reagojnë mbi këtë çështje. Ish-futbollisti Saimir Patushi ka komentuar në postim duke thënë:
“President heshtja nuk zgjidh gjë vetëm trazon më shumë ujin dhe e çon te ata që se duan Vllazninë kurse dialogu ose gjuha e perbashket me Ultrasit sjellë progres se nuk kanë vende në botë që u mbyll derën e stadiumit tifozëve. Sa presidenta ikin e vijnë por ngjyrat janë të qytetit dhe të tifozëve sidomos Utrasit”.
Ndërsa ish-trajneri i Erzenit, dhe ish-lojtar i klubit shkodran, Skerdi Bejzade shprehet se: “Vllaznia pa ultrasit kuqeblu nuk quhet Vllazni. Cit Gjergj Fishta”.
Një vërshim komentesh nga figura të ndryshme sportive, por edhe tifozë që nuk kanë mbetur pa marrë një përgjigje nga kreu u klubit. Xhaferi ka shkuar më tej duke sqaruar me detaje se pse klubi ka marrë këtë vendim për mbylljen e sektorit.
“Nuk e kuptoj se për çfarë duhet të pronocohet klubi, ku dje në ndeshje ka patur në total një numër prej 700 vetash dhe duke u referuar me numrin e ulët të biletave të shitura, për të qenë tifozëria më e bashkuar edhe nga ana vizuale si dhe për të optimizuar kostot kemi vendos si klub për të hapur tribunën ballore, A ,B dhe VIP-in.
Këtë ja kemi shpjeguar dhe shumë tifozave që na kanë kontaktuar. Siç e citova më lart, tifozëria është zemra e ekipit dhe kemi mbështet dhe do vazhdojmë të mbështesim çdo tifoz apo grup tifozash që janë në të mirë të ekipit”, sqaron Xhaferi në komente.
