Detaje të reja dalin në dritë nga atentati i ndodhur mesditën e sotme në zonën e “Don Boskos” në Tiranë ku mbetën të plagosur dy persona.
Drejtori i Policisë së Tiranës, Tonin Vocaj nga vendgjarja ku u shënua plagosja e dyfishtë në zonën e Don Boskos, është shprehur se Policia dhe grupi hetimor në bazë të këqyrjes paraprake të kamerave të sigurisë, është krijuar një ide e qartë se si ka ndodhur ngjarjen e rëndë kriminale.
Sipas Vocajt, në atentat kanë marrë pjesë tre persona përfshirë edhe drejtuesit e automjetit, që është gjendur i djegur në periferi të Tiranës. Nga ajo se çfarë hetuesit kanë zbuluar deri më tani, është se autorët sipas Vocajt nuk kanë dalë nga automjeti por kanë qëlluar nga brenda tij, duke plagosur Elezaj dhe Metushin, të cilët rezulton paraprakisht të kenë vetëm lidhje shoqërore me njëri-tjetrin.
“Në një lokal privat në Don Bosko, janë plagosur dy shtetas, Kastriot Elezaj dhe Renato Metushaj, ndodhen në spitalin e Traumës. Policia ka ngritur grupin e posaçëm hetimor nën drejtimin e Prokurorisë. Gjithashtu po kontrollojmë në të gjithë zonën për kamerat e sigurisë në biznese dhe ato publike. Është gjetur automjeti i djegur, ka përputhshmëri me ato të përdorur nga autori.
Nuk rezulton të jetë me targa të vjedhura po nr.shasisë nuk përputhet me atë të makinës origjinale. S’është përcaktuar tipi i armës, janë gjetur gjithashtu edhe 7 gëzhoja. Në automjet është gjetur një armë zjarri, po ekzaminohet. Janë vetëm lidhje shoqërore këto të plagosurit, po pinin kafe.
Nuk dihet kush ka qenë shënjestër, nga hetimi do rezultojë se kush ka qenë objekt. Mendohet se kanë qenë 3 persona, përfshirë drejtuesi i mjetit. Nuk janë gjetur gjëra të paligjshme nga të plagosurit.
Njëri prej tyre është me precedent penal, po hetojmë për të shkuarën e të plagosurve dhe njëkohësisht konfliktet e mundshme që mund të kenë, se janë pistat kryesore. Autorët kanë qëlluar nga automjeti, s’kanë zbritur. Kemi pamjet se si ka ndodhur ngjarja, kemi ide te qartë për ngjarjen e rëndë kriminale. Këta kanë hapur zjarr nga makina dhe propabiliteti mund të kenë qenë të maskuar është i madh“, tha Vocaj.
Dy të plagosurit Kastriot Elezi 45 vjeç dhe Ronaldo Metushi 22 vjeç ndodhen jashtë rrezikut për jetën. Sipas informacioneve shënjestër dyshohet të jete Kastriot Elezi. Sipas të dhënave ai është person me precedent penal te mëparshëm për pjesëmarrje ne grup kriminal në Itali. Elezi është kapur nga komisariati numër 3 dhe është ekstraduar në Itali ku ka vuajtur dënimin për dy vite ndërsa sipas informacioneve ka pak kohë që është kthyer.
Lexo edhe:
Krimi “pushton” vendin/ Kush ishte objektivi i atentatit në “Don Bosko”, autori në arrati (PAMJET)
