Kanë përfunduar dy sfidat e mbrëmjes të vlefshme për javën e tretë të Kategorisë Superiore.
Në Durrës, Teuta vendase pësoi disfatë nga Partizani, me skuadrën kryeqytetase e cila triumfoi me rezultatin e pastër 0-2. Goli i parë i sfidës erdhi nga Arinaldo Rrapaj në minutën e 59’-të, ndërsa në të 89’ Kristian Mba vulosi duelin.
Në këtë ndeshje përveç trajnerit Veselinoviç debutuan edhe futbollistët Rrok Toma me Mateo Shanaj, afrime të ditëve të fundit tek të dyja skuadrat. Me këtë fitore, Partizani shkon në kuotën e 6 pikëve ndërsa Teuta mbetet me 3 pikë.
Në sfidën tjetër, në Korçë Skënderbeu ka mposhtur Vllazninë me rezultatin 1-0. Shkodranët luajtën me 10 lojtarë prej minutës së 25-të, kur Dodaj u ndëshkuar me karton të kuq për ndërhyrje të gabuar ndaj Vangjelit.
Për golin e triumfit mendoi sulmuesi Bismark, i cili në minutën e 84-t, u zhbllokua duke gjetur rrugën e rrjetës. Një gol me mjaft vlera për korçarët që u ngjitën në kuotën e 4 pikëve.
Ndërkohë në krahun tjetër për Vllazninë kjo ishte disfata e parë në 3 javë, pas një fitoreje dhe një barazimi.
